पिंपरीमध्ये तलाठी महिलेला ७ हजार रुपयांची लाच घेताना लाचलुचपत प्रतिबंधक पथकाने रंगेहात अटक केली आहे. लाचलुचपत प्रतिबंधक पथकाने तलाठी महिलेसह तिच्या साथीदारालादेखील दुपारी अटक केली आहे. वैशाली मोरे असे अटक करण्यात आलेल्या तलाठी अधिकाऱ्याचे नाव आहे. तर साथीदाराचे नाव परमेश्वर बनसोडे असल्याची माहिती मिळते आहे. पिंपरी येथे तलाठी कार्यालयात तलाठी या पदावर कार्यरत असलेल्या वैशाली नामदेव मोरे (वय वर्षे ३६) यांनी नेहरुनगरमधील व्यापाऱ्याला घराची आणि सातबाराची नोंदणी करण्यासाठी ७ हजार रुपयांची लाच मागितली होती. यानंतर नेहरुनगरच्या व्यापाऱ्याने लाचलुचपत विभागाकडे तक्रार केली होती. लाचलुचपत विभागाने सापळा रचून आज दुपारी पिंपरीतील तलाठी कार्यालयात तलाठी वैशाली मोरे यांना ७ हजार रुपयांची लाच स्वीकारताना अटक केली. वैशाली मोरे यांच्यासोबत असलेल्या परमेश्वर बनसोडे यांनादेखील पोलिसांकडून अटक करण्यात आली आहे.
