पुणे : बंगालच्या उपसागरातील कमी दाब क्षेत्राचे चक्रीवादळात रुपांतर होत आहे. या चक्रीवादळाला थायलंडने सुचवलेले मोंथा हे नाव देण्यात आले असून, या चक्रीवादळाच्या प्रभावामुळे पुढील ३८ तासांत पुण्यासह राज्यातील काही जिल्ह्यांत मुसळधार पावसाचा अंदाज वर्तवण्यात आहे.
अरबी समुद्र आणि बंगालचा उपसागर अशा दोन्ही समुद्रात सध्या हवामान प्रणाली सक्रिय आहेत. त्यापैकी बंगालच्या उपसागरातील कमी दाब क्षेत्राची तीव्रता वाढून त्याचे तीव्र चक्रीवादळात रुपांतर होण्याची शक्यता आहे. मोंथा असे नाव असलेले हे चक्रीवादळ वायव्येकडे सरकून मंगळवारी (२८ ऑक्टोबर) आंध्र प्रदेशच्या किनाऱ्यावर धडकण्याचा अंदाज आहे. या चक्रीवादळाचा परिणाम म्हणून आंध्र प्रदेश, ओडिशा, तेलंगणा, छत्तीसगड या राज्यांना रेड अलर्ट, तर पूर्व विदर्भाला ऑरेंज अलर्ट देण्यात आला आहे.
ज्येष्ठ हवामानशास्त्रज्ञ अनुपम कश्यपी यांनी दिलेल्या माहितीनुसार, मोंथा चक्रीवादळाच्या प्रभावामुळे पुढील ४८ तासांत पुण्यासह राज्यभरात मेघगर्जनेसह वादळी पावसाची शक्यता आहे. पुणे, मुंबई, गडचिरोली, गोंदिया, चंद्रपूर, भंडारा, नागपूर या जिल्ह्यांसाठी इशारा देण्यात आला आहे.
मोंथाचा अर्थ काय?
उत्तर हिंद महासागर प्रदेशातील चक्रीवादळांना नाव देण्याचे काम भारतीय हवामानशास्त्र विभागाच्या अखत्यारितील प्रादेशिक विशेष हवामान केंद्राद्वारे केले जाते. हे केंद्र जागतिक हवामान संघटना, आशिया आणि पॅसिफिकसाठी संयुक्त राष्ट्रांचा आर्थिक आणि सामाजिक आयोग यांच्या देखरेखीखाली कार्य करते. या प्रदेशातील चक्रीवादळांसाठी नावे सुचवणाऱ्या देशांमध्ये बांगलादेश, भारत, मालदीव, म्यानमार, ओमान, पाकिस्तान, श्रीलंका, थायलंड, येमेन, इराण, कतार, सौदी अरेबिया आणि संयुक्त अरब अमिराती यांचा समावेश आहे.
प्रत्येक देशाकडून १३ नावे सुचवण्यात येतात. त्यानुसार तयार होणाऱ्या १६९ नावांची यादी तयार होते. नवीन चक्रीवादळ तयार झाल्यावर हवामान विभागाकडून या यादीतील पुढील नाव त्या चक्रीवादळाला देण्यात येते.बंगालच्या उपसागरात तयार झालेल्या चक्रीवादळाला मोंथा हे थायलंडने सुचवलेले नाव देण्यात आले आहे. सुवासिक फुल किंवा सुंदर फुल असा मोंथा या शब्दाचा थाई भाषेतील अर्थ आहे.
