पुणेकरांना डेंग्यूचा ताप! मे महिन्याच्या तुलनेत जूनमध्ये रुग्णसंख्या दुप्पट

शहरात मे महिन्यात डेंग्यूचे २३ संशयित रुग्ण आढळले होते. त्यातील दोन जणांना डेंग्यूचे निदान झाले होते. जूनमध्ये संशयित रुग्णांची संख्या ५९ वर पोहोचली आहे. या वर्षभरात डेंग्यूचे एकूण १८९ संशयित आणि ८ निदान झालेले रुग्ण आढळले आहेत. या वर्षी जानेवारीत ३० संशयित रुग्ण आढळले असून, त्यानंतर फेब्रुवारी ३१, मार्च १९, एप्रिल १९, मे २३ आणि जून ५९ अशी रुग्णसंख्या आहे. या वर्षभरात चिकुनगुनियाचे ८ रुग्ण आढळले आहेत, अशी माहिती महापालिकेच्या आरोग्य विभागाने दिली.

शहरातील मागील ३ वर्षांतील कीटकजन्य आजारांचा उद्रेक झालेल्या भागांवर आरोग्य विभागाने अधिक लक्ष केंद्रित केले आहे. या ठिकाणी औषध फवारणी करण्यात येत आहे. गेल्या वर्षी जास्त रुग्णसंख्या आढळून आलेल्या उद्रेकग्रस्त भागात साथरोग प्रतिबंधक उपाययोजनांवर भर देण्यात आला आहे. पावसाळ्याच्या तोंडावर संभाव्य पूर नियंत्रण आराखड्यामधील पाणी साचणाऱ्या ठिकाणी औषध फवारणीचे नियोजनही करण्यात आले आहे, असे सहायक आरोग्य अधिकारी डॉ. राजेश दिघे यांनी सांगितले.

तब्बल ३३ हजार ४७४ डासोत्पत्ती स्थाने

आरोग्य विभागाने गेल्या वर्षी नोव्हेंबरपासून शहरात ३३ हजार ४७४ कायम डासोत्पत्ती स्थाने, तर ३७ हजार ८७४ तात्पुरती डासोत्पत्ती स्थाने शोधली आहेत. या ठिकाणी डासप्रतिबंधक उपाययोजना सुरू आहेत. गप्पी मासे हे डासअळीभक्षक असल्याने शहरात १८१ गप्पी मासे पैदास केंद्रे सुरू असून, त्यामधून नागरिकांच्या मागणीनुसार २ हजार ५१८ ठिकाणी गप्पी मासे सोडण्यात आले आहेत. कंटेनर सर्वेक्षणादरम्यान डासोत्पत्ती आढळलेल्या ८१४ नागरिक अथवा आस्थापनांना नोटीस बजाविण्यात आली असून, त्यांना ९६ हजार ३०० रुपयांचा दंड आकारण्यात आला आहे.

डेंग्यू व चिकुनगुनिया पसरविणाऱ्या डासांची पैदास घरातील अथवा गृहनिर्माण संस्थांमधील पाणीसाठ्यामध्ये होते. त्यामुळे नागरिकांनी आठवड्यातून एकदा कोरडा दिवस पाळावा. तसेच, नागरिकांनी पूर्ण बाह्याचे कपडे परिधान करावेत आणि डास प्रतिबंधक औषधाचा वापर करावा. पावसाळ्याच्या काळात मच्छरदाणीच्या वापरास प्राधान्य द्यावे. – एम. जे. प्रदीप चंद्रन, अतिरिक्त आयुक्त, पुणे महापालिका