पुण्यात १२ लाखांचे ड्रग्ज जप्त; दहशतवादविरोधी पथकाची मोठी कारवाई

याबाबत दहशतवाद विरोधी पथकाने दिलेल्या माहितीनुसार, पुणे रेल्वे स्टेशनच्या परिसरातील मालधक्का चौका रस्त्यावर  एक जण येणार असल्याची माहिती मिळाली होती. त्यानुसार दहशतवाद विरोधी पथकाने तेथे सापळा रचून महंमद टाक याला पकडले. त्याची झडती घेतली असता त्याच्याकडे ११ लाख ८० हजार रुपयांचे ११८ ग्रॅम एम डी अंमली पदार्थ सापडले. त्याच्याकडून मोबाईल, डिजिटल वजन काटा, २ हजार ५९० रुपये रोख, आधारकार्ड, डेबिट कार्ड असा मुद्देमाल जप्त करण्यात आला. 

याबाबत पोलीस हवालदार अशोक पेरणेकर यांनी दहशतवाद विरोधी पथकाच्या मुंबई पोलीस ठाण्यात फिर्याद दिली आहे. पोलीस निरीक्षक संतोष सुभाळकर, सहायक निरीक्षक दत्तात्रय दराडे, पोलीस नाईक गायकवाड, पोलीस हवालदार पेरणेकर,शिंदे, गुंजाळ यांनी ही कारवाई केली. पोलीस निरीक्षक विश्वास भास्कर तपास करीत आहेत.