येरवडा चौकात लघुशंका करणारा मुख्य आरोपी गौरव आहुजाला अटक

तर या प्रकरणातील मुख्य आरोपी गौरव मनोज अहुजा हा गाडी चालवत होता आणि त्याच्या बाजूला भाग्येश निबजीया ओसवाल शेजारी बसलेला होता.या दोघांविरोधात येरवडा पोलिसांनी गुन्हा दाखल केला.या दोन्ही आरोपींच्या शोधासाठी पोलिसांनी पथक रवाना केली होती.त्यातील आरोपी भाग्येश निबजीया ओसवाल याला कालच सायंकाळच्या सुमारास अटक केली होती.तर मुख्य आरोपी गौरव आहुजा चा शोध पुणे पोलीस घेत होते.त्याच दरम्यान गौरव आहुजा याने त्याच्याकडून झालेल्या कृत्याबाबत माफी मागत असलेला व्हिडिओ समोर आला.त्यानंतर गौरव आहुजा याला पुणे पोलिसांनी सातारा येथून ताब्यात घेतले असून त्याची वैद्यकीय तपासणी केली आहे.आता पुणे जिल्हा सत्र न्यायालयात पोलिस किती वाजता हजर करतात आणि काय युक्तीवाद होतो,याकडे सर्वांचे लक्ष लागून राहिले आहे.

याबाबत पोलिसांकडून मिळालेली माहिती अशी की, जागतिक महिला दिनी पुण्यातील येरवडा परिसरातील रस्त्यावर अश्लील कृत्य करणारा गौरव आहुजा हा कराड परिसरात असल्याची महिती साताऱ्याचे पोलीस अधीक्षक समीर शेख यांना मिळाली. त्यानंतर त्यांनी कराडचे पोलीस उपअधीक्षक अमोल ठाकूर यांना कारवाईच्या सूचना दिल्या. यावर अमोल ठाकूर यांनी कराड शहर पोलीस ठाण्यातील रात्र गस्तीसाठी (नाईट पेट्रोलिंग) असणाऱ्या अधिकाऱ्यांना पोलीस अधीक्षक शेख यांच्या मार्गदर्शनानुसार सूचना दिल्या. लगेचच पोलिसांनी पुणे- बंगळुरू महामार्गावरील वारूंजी फाटा येथे सापळा रचून गौरव आहुजा याला ताब्यात घेतले. त्यानंतर त्याला घेऊन कराड पोलिसांचे पथक पुण्याला रवाना होत मध्यरात्री त्याला येरवडा पोलिसांच्या स्वाधीन करण्यात आले. रविवारी सकाळी त्याला अटक करण्यात आली आहे.

मला माफ करा, पुढील आठ तासात पोलिसांसमोर हजर होणार असे गौरव आहुजा व्हिडिओ मध्ये बोलताना दिसतोय मुख्य आरोपी गौरव मनोज अहुजा चा माफी मागताना चा व्हिडिओ लोकसत्ता डॉट कॉम च्या हाती आला आहे.त्यामध्ये मुख्य आरोपी गौरव आहुजा हा हात जोडून म्हणतोय, नमस्कार मी गौरव आहुजा राहणार पुणे, माझ्याकडून पब्लिकमध्ये जे कृत्य घडले,ते कृत्य खूप चुकीचे होते.त्यामुळे मी मनापासून माफी मागतो,संपूर्ण जनता,पोलीस विभाग आणि शिंदे साहेब,या सर्वांची मी मनापासून माफी मागतो.मला माफ करा आणि मला एक संधी द्या,तसेच मी पुढच्या आठ तासात येरवडा पोलिसांसमोर हजर होणार आहे.माझ्या कुटुंबातील कोणत्याही सदस्यांना त्रास देऊ नका,अशी विनंती करताना आरोपी दिसत आहे.आता त्यावर येरवडा पोलीस कशा प्रकारे पुढील कार्यवाही करतात हे पाहणे जरुरीचे ठरणार आहे.