पिंपरी : एका युट्युबरने शेअर मार्केट संदर्भात पोस्ट केलेले व्हिडिओ पाहून चिखली येथील एकजण प्रभावित झाला. युट्युबर वाकड येथील एका हॉटेलमध्ये येणार असल्याचे समजताच तिथे जाऊन युट्युबरची भेट घेतली. शेअर मार्केटचे खाते सुरू करण्यासाठी रोख रक्कम दिली. त्यानंतर गुंतवणुकीसाठी रक्कम पाठवली, मात्र पैसे परत न मिळाल्याने आपली फसवणूक झाल्याचे लक्षात आले.
ही घटना २१ जानेवारी ते ४ जुलै २०२३ या कालावधीत हिंजवडी पोलीस ठाण्याच्या हद्दीत घडली. याप्रकरणी एकाने हिंजवडी पोलीस ठाण्यात फिर्याद दिली आहे. त्यानुसार दोन युट्युबरविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, तक्रारदाराला शेअर मार्केट आणि ट्रेडिंगची आवड असल्याने ते युट्युबवर व्हिडिओ पाहत असतात. तिथे आरोपींच्या युट्युब चॅनलवर हिरेमठ यांना उपयुक्त आणि आकर्षक माहिती मिळाली. दरम्यान, युट्युबर वाकड येथील एका हॉटेल येथे येणार असल्याचे तक्रारदाराला समजले. तक्रारदाराने हॉटेल मध्ये जाऊन आरोपींची भेट घेतली. तिथे शेअर मार्केटचे खाते सुरू करण्यासाठी त्यांनी आरोपींना ४५ हजार रुपये रोख स्वरूपात दिले. त्यानंतर तक्रारदाराचे एक आभासी खाते तयार करण्यात आले. त्यामध्ये दररोज डॉलरमध्ये पैसे जमा होऊ लागले.
आरोपींनी सोलापूर येथे एक सेमिनार आयोजित केला. तक्रारदार सोलापूर येथे जाऊन आरोपींना भेटले. आरोपींनी त्यांच्याकडून आणखी तीन लाख ९८ हजार ५०० रुपये गुंतवणूक स्वरूपात घेतले. त्यानंतर मात्र तक्रारदाराच्या खात्यात डॉलर जमा झाले नाहीत. आरोपींना संपर्क केला असता आरोपींनी उडवाउडवीची उत्तरे दिली. काही कालावधीनंतर आरोपींनी त्यांचे मोबाईल फोन बंद केले. आपली फसवणूक झाल्याचे लक्षात येताच तक्रारदाराने १४ जुलै २०२५ रोजी पोलिसात तक्रार दिली.
दापोडीत पिस्तूल बाळगल्याप्रकरणी तरुणास अटक
पिस्तूल बाळगल्याप्रकरणी मालमत्ता गुन्हे विरोधी पथकाने एका तरुणाला अटक केली. त्याच्याकडून एक पिस्तूल जप्त करण्यात आले आहे. ही कारवाई सोमवारी (१४ जुलै) रात्री कासारवाडी रेल्वे स्थानकाजवळ करण्यात आली. साहिल अशोक रजपूत (२५, मंगळवार पेठ, पुणे) असे अटक केलेल्या तरुणाचे नाव आहे. याप्रकरणी पोलीस शिपाई समीर रासकर यांनी दापोडी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, कासारवाडी रेल्वे स्थानकाजवळ एक तरुण पिस्तूल घेऊन आल्याची माहिती मालमत्ता गुन्हे विरोधी पथकाला मिळाली. त्यानुसार पोलिसांनी सापळा लावून साहिल रजपूत याला ताब्यात घेतले. त्याची झडती घेतली असता त्याच्याकडे ५१ हजार रुपये किमतीचे एक पिस्तूल आणि एक जिवंत काडतूस जप्त केले आहे.
बावधनमध्ये जमीन विक्रीच्या बहाण्याने फसवणूक
जमीन विक्रीच्या बहाण्याने एका महिलेची १७.८० लाखांची फसवणूक करण्यात आली. ही घटना फेब्रुवारी २०२४ ते १४ जुलै २०२५ या कालावधीत भुकूम येथे घडली. याप्रकरणी महिलेने बावधन पोलीस ठाण्यात फिर्याद दिली आहे. त्यानुसार एका विरोधात गुन्हा दाखल करण्यात आला आहे. पोलिसांनी दिलेल्या माहितीनुसार, आरोपीने फिर्यादी महिलेला भुकूम येथील एक जागा विकण्यासाठी ५७.२० लाखांचा व्यवहार केला. जमीन विक्रीसाठी आरोपीने बनावट कागदपत्रे तयार केली. महिलेकडून १७.८० लाख रुपये घेऊन त्यांना संबंधित जमिनीचे खरेदीखत करून न देता त्यांची फसवणूक केली.
कंपनीच्या नावाने गुंतवणूक घेऊन पावणेदोन कोटींची फसवणूक
बांधकाम व्यवसाय कंपनी स्थापन करून त्याअंतर्गत गुंतवणूक रक्कम घेत पाच जणांनी मिळून एक कोटी ८६ लाख ८१ हजार रुपयांची फसवणूक केली. ही घटना मार्च २०२३ ते ऑगस्ट २०२३ या कालावधीत मोशी, म्हाळुंगे, चाकण, चऱ्होली येथे घडली. याप्रकरणी नरेंद्र धनराज आमले (२९, मोशी) यांनी १४ जुलै रोजी एमआयडीसी भोसरी पोलीस ठाण्यात फिर्याद दिली आहे. त्यानुसार तिघांविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, एक कंपनी स्थापन केली. या कंपनीच्या संचालनातून होणाऱ्या नफ्यातून प्रत्येकी पाच टक्के नफा मिळेल. तसेच कंपनीच्या बांधकाम प्रकल्पात प्रत्येकाला एक सदनिकादेखील मिळेल, असे आरोपींनी नरेंद्र आणि इतर लोकांना सांगितले. त्यापोटी आरोपींनी नरेंद्र आणि इतर लोकांकडून एक कोटी ८६ लाख ८२ हजार ६०० रुपये घेत फसवणूक केली.
