पुणे : कल्याणीनगर अपघात प्रकरणात दोन आरोपींविरुद्ध पोलिसांनी न्यायालयात आरोपपत्र दाखल केले. अपघात प्रकरणातील अल्पवयीनांच्या रक्ताच्या नमुन्यात बदल करुन पुरावा नष्ट केल्याप्रकरणी अटकेत असलेल्या दोन आरोपीविरुद्ध २४२ पानी आरोपपत्र दाखल करण्यात आले.
आदित्य अविनाश सुद (वय ५२ वर्षे, रा. बंगला क्रमांक ३, सोपानबाग सोसायटी, घोरपडी), आशिष सतीश मित्तल (वय ३७, रा. बेलवेडर सोसायटी, विमााननगर) अशी आरोपींची नावे आहे. अल्पवयीनांच्या रक्ताच्या नमुन्यात बदल करुन पुरावा नष्ट केल्याप्रकरणी पोलिसांनी विशेष न्यायालयात २४२ पानी आरोपपत्र दाखल केले. आरोपपत्रात १७ साक्षीदारांचे जबाब नोंदवून जोडण्यात आले आहेत.
हेही वाचा : पुणे: प्रचार फेरीत भाजप कार्यकर्त्यांमध्ये हाणामारी, संगमवाडीतील घटना
येरवड्यातील कल्याणीनगर भागात १९ मे राेजी भरधाव मोटारीच्या धडकेत दुचाकीस्वार संगणक अभियंता तरुण-तरुणीचा मृत्यू झाला होता. याप्रकरणी बांधकाम व्यावसायिक विशाल अगरवालच्या मुलास पोलिसांनी ताब्यात घेतले होते. मोटारचालक अल्पवयीनाबरोबर मोटारीत त्याचे दोन मित्र होते. अगरवालचा मुलगा, त्याच्याबरोबर असलेल्या दोन मित्रांनी मद्यप्राशन केले होते. वैद्यकीय तपासणीसाठी त्यांना ससून रुग्णालयात नेण्यात आले होते. रुग्णालायत तिघांच्या रक्ताच्या नमुन्यात बदल करण्यात आले होते. बांधकाम व्यावसायिक विशाल अगरवाल, त्याची पत्नी, शिवानी, अरुणकुमार सिंग यांनी ससूनमधील डाॅ. अजय तावरे, डाॅ. श्रीहरी हाळानोर यांच्याशी संगनमत करुन रक्ताचे नमुने बदलल्याचे तपासात उघड झाले होते. याप्रकरणी त्यांच्याविरुद्ध गुन्हा दाखल करण्यात आला होता. याप्रकरणात गु्न्हा दाखल झाल्यानंतर फरार झालेला आरोपी अरुणकुमार देवनाथ सिंग याचा अटकपूर्व जामीन अर्ज सर्वोच्च न्यायालायने नुकताच फेटाळून लावला. त्यानंतर सिंग पोलिसांना शरण आला. रक्ताचे नमुने बदल प्रकरणात आरोपी आदित्य सूद आणि आशिष मित्तल सामील असल्याचे उघडकीस आल्यानंतर पाेलिसांनी त्यांना अटक केली होती.
