पुणे : शहरातील ऐतिहासिक वास्तूंची माहिती पर्यटनासाठी पुण्यात येणाऱ्या पर्यटकांना व्हावी, यासाठी काही वर्षांपूर्वी महापालिकेच्या दुर्लक्षामुळे बंद पडलेला ‘हेरिटेज वॉक’ पुन्हा सुरू करण्याचा निर्णय महापालिकेने घेतला आहे. या प्रस्तावाला स्थायी समितीमार्फत मुख्य सभेने मंजुरी दिल्याने पुढील काही दिवसांत हा उपक्रम सुरू होणार आहे.
पुणे शहराला ऐतिहासिक वारसा आहे. शहरात शनिवार वाडा, लाल महाल, विश्रामबाग वाडा, कसबा गणपती यासह अनेक जुन्या वास्तू आहेत. शहरात पर्यटनासाठी येणाऱ्यांना या वास्तूंबाबत उत्सुकता असते. पुणे शहराचा वारसा नागरिकांना समजावा, यासाठी पुणे महापालिका आणि जनवाणी या संस्थेने ‘हेरिटेज वॉक’ हा उपक्रम २०१२ मध्ये सुरू केला होता. सुरुवातीची दोन वर्षे या उपक्रमाला मोठा प्रतिसाद मिळत होता. या उपक्रमात शहरातील १५ ऐतिहासिक वास्तूंची माहिती तज्ज्ञ आणि अभ्यासकांकडून दिली जात होती. यामध्ये शनिवारवाडा, भिडे वाडा ते विश्रामबाग वाडा यांचा समावेश होता. या उपक्रमाकडे महापालिकेने लक्ष न देत त्यामध्ये सातत्य न ठेवल्याने कालांतराने हा उपक्रम बंद पडला.
दोन वर्षांपूर्वी प्रायोगिक तत्त्वावर ‘हेरिटेज वॉक’चा उपक्रम वर्षभरासाठी पुन्हा सुरू करण्यात आला होता. प्रत्येक शनिवारी आणि रविवारी सकाळी हा उपक्रम घेतला जात होता. याला नागरिकांकडून चांगला प्रतिसाद मिळत होता. त्यानंतर आता खासगी पद्धतीने हेरिटेज वॉक उपक्रम राबविणाऱ्या अजित आपटे यांनी हा उपक्रम पुन्हा सुरू करण्यासाठी महापालिकेकडे प्रस्ताव दिला होता. त्यानंतर महापालिका प्रशासनाने हा प्रस्ताव तयार करून स्थायी समितीसमोर मान्यतेसाठी ठेवला होता.
स्थायी समितीच्या बैठकीत हा प्रस्ताव दाखल मान्य करण्यात आला. त्यानंतर महापालिकेच्या सर्वसाधारण सभेतही हा विषय मान्यतेसाठी ठेवण्यात आला होता. महापालिका आयुक्त आणि प्रशासक डॉ. राजेंद्र भोसले यांच्या अध्यक्षतेखाली झालेल्या सर्वसाधारण सभेत या विषयाला मान्यता देण्यात आली. सर्वसाधारण सभेने त्याला मान्यता दिल्याने आता पुढील काही दिवसांत हा उपक्रम सुरू केला जाणार असून, याद्वारे नागरिकांना आणि पर्यटकांना शहराचा इतिहास, तसेच ऐतिहासिक स्थळे, वारसा यांची माहिती मिळणार आहे.
शनिवार, रविवारी ‘हेरिटेज वॉक’
महापालिकेने हेरिटेज वॉकच्या प्रस्तावाला मान्यता दिल्याने आठवड्यातून दोन दिवस शनिवार आणि रविवारी सकाळी सात ते साडेनऊ या वेळेत हा ‘हेरिटेज वॉक’ होणार आहे. यामध्ये पर्यटकांना छत्रपती शिवाजी महाराज पूल, घोरपडे घाट, शनिवार वाडा, कसबा गणपती मंदिर, लाल महाल, भिडे वाडा, बेलबाग मंदिर, पुणे नगरवाचन मंदिर, तुळशीबाग, महात्मा फुले मंडई, विश्रामबाग वाडा ही ठिकाणे दाखविली जाणार आहेत. सर्वसाधारणपणे अडीच किलोमीटरचा हा वॉक असणार आहे.
