पिंपळेसौदागरमधील रस्ता खचल्यावर महापालिकेला जाग; आता नोटिसा पाठवण्याचा फार्स

हेही वाचा >>> पिंपरी : मनसेचे पालिकेसमोर आंदोलन… क्रिकेट स्टेडियम नको, दररोज पाणीपुरवठा करा!

पिंपळेसौदागर येथील कुणाल आयकॉन रस्त्यावर बांधकाम व्यावसायिकाच्या इमारतीचे काम सुरु आहे. इमारतीसाठी खोल खड्डा खोदण्यात आला आहे. त्याच्या चारही बाजुंनी पायलिंग केले. पण, ते निकृष्ट दर्जाचे असल्याने महापालिकेचा १५ फूट रस्ता खचला. घटना सकाळी घडल्यामुळे मोठी जीवितहानी टळली. पण, महापालिकेची जलवाहिनी फुटली आहे. महापालिकेने बांधकाम व्यावसायिकाकडून जलवाहिनी आणि रस्ता दुरुस्तीचा खर्च घेतला आहे.

महापालिकेने बांधकाम व्यावसायिक घनश्याम सुखवानी, संजय रामचंदानी यांना नोटीस बजाविली आहे. पायाचे खोदकाम करताना ५० ते ६० मीटर लांबीची संरक्षक भिंत ढासळून रस्ता खचला. त्यामुळे पाण्याची ३०० व्यासाची जलवाहिनी, पावसाळी पावसाची वाहिनी,  ड्रेनेज लाइन, वीजवाहिनी तुटली आहे. यामुळे लोकांच्या संरक्षणास बाधा निर्माण झाली आहे. त्यामुळे बांधकाम तत्काळ बंद करावे. नकाशाप्रमाणे सीमाभिंत बांधवी. स्ट्रॉम वॉटर वाहिनी, पाण्याची जलवाहिनी, इतर सेवावाहिन्या दुरुस्त करुन रस्ता पूर्ववत वाहतुकीस उपलब्ध करुन द्यावा. सुरक्षाकडे बसवून हे काम करावे. रात्रीच्या वेळेस अपघात होणार नाही याची काळजी घ्यावी. जीवित, वित्तहानी झाल्यास विकसक म्हणून सर्वस्वी जबाबदारी राहील. काम पूर्ण केल्याचा लेखी अहवाल महापालिकेला द्यावा. काम पूर्ण होईपर्यंत बांधकाम परवानगीस स्थगिती देण्यात आल्याचे नोटिसीत म्हटले आहे.

हेही वाचा >>> सावधान! फॉलकोडिनयुक्त औषधे धोकादायक; नशेसाठीही  होतोय वापर

दरम्यान, पिण्याचे पाणी, पावसाळी पाण्याची जलवाहिनी तुटल्याने सार्वजनिक मालमत्तेचे नुकसान झाले आहे. त्यामुळे विकासकावर कारवाई करण्याबाबत महापालिकेचे उपअभियंता विनायक माने यांनी सांगवी पोलीस ठाण्यात तक्रार दिली आहे.

रस्त्याला लागून कोणी बांधकाम इमारतीसाठी पाया खोदत असेल तर, त्यांना काळजी घेण्याबाबत सूचना दिल्या आहेत. विकसकांना दक्षता घेण्याबाबत नोटीस देण्याचे निर्देश क्षेत्रीय कार्यालयातील कार्यकारी अभियंत्यांना दिले आहेत.

डॉ. ज्ञानदेव जुंधारे- सह शहर अभियंता (पिंपरी-चिंचवड महापालिका)