पुण्यातील नाट्यगृहांची होणार दुरुस्ती… महापालिका करणार ‘एवढे’ कोटी खर्च

पुणे : शहरातील चौदा नाट्यागृहांचे नूतनीकरण आणि दुरुस्तीसाठी सात कोटींची आवश्यकता भासणार असून महापालिकेकडून त्याबाबतचे पूर्वगणन पत्रक तयार करण्यात आले आहे. प्रशासकीय मंजुरीनंतर नाट्यगृहांच्या दुरुस्तीची कामे हाती घेण्यात येणार आहेत.सांस्कृतिक राजधानी असलेल्या पुण्यातील नाट्यगृहांची दुरवस्था झाली आहे. पायाभूत सुविधांचा अभाव बहुतांश नाट्यगृहात असून नाट्यकर्मींकडून त्याबाबत वेळोवेळी नाराजी व्यक्त करण्यात आली आहे. शहरात महापालिकेची चौदा नाट्यगृहे आहेत. बालगंधर्व रंगमंदिर, स्वारगेट परिसरातील गणेश कला क्रीडा रंगमंदिर, कोथरूड येथील यशवंतराव चव्हाण नाट्यगृह, सातारा रस्ता परिसरातील अण्णाभाऊ साठे रंगमंदिर ही प्रमुख नाट्यगृहे आहेत. मात्र, या चारही प्रमुख नाट्यगृहांची दुरवस्था झाली असून पिण्याच्या पाण्याचा अभाव, अस्वच्छ स्वच्छतागृहे, बंद अवस्थेतील वातानुकूलन आणि ध्वनिक्षेपक यंत्रणा आहे. अनेक नाट्यगृहांना रंगरंगोटीची आवश्यकता आहे.