शस्त्र परवाना प्रकरणी सुशील हगवणेला जामीन मंजूर

वैष्णवी हगवणे मृत्यू प्रकरणात पती शशांक, दीर सुशील, सासू-सासरे, नणंद, तसेच नीलेश चव्हाण यांना अटक करण्यात आली. शशांक, सुशील, नीलेश यांनी एकाच वर्षी पुणे पोलिसांकडून शस्त्र परवाने मिळवले होते. शशांक आणि सुशील हे मुळशी तालुक्यातील भुकूम येथे राहायला आहेत. दोघांनी परवान्यासाठी पुण्यातील वास्तव्याचा पत्ता दिला होता. वारजे आणि कोथरूड पोलीस ठाण्यात त्यांनी भाडेतत्त्वावर घेतलेल्या सदनिकेचा करारनामा दिला होता. शस्त्र परवाना प्रकरणात त्यांनी पोलिसांची दिशाभूल केल्याचे उघडकीस आले होते. त्यानंतर त्यांच्याविरुद्ध कोथरूड आणि वारजे पोलीस ठाण्यात स्वतंत्र गुन्हे दाखल करण्यात आले होते.

कोथरूड पोलिसांनी न्यायालयात अर्ज करून सुशील हगवणे याला सोमवारी अटक केली होती. त्याला न्यायालयाने मंगळवारी जामीन मंजूर केला. सरकारी वकील पल्लवी काशिद यांनी बाजू मांडली. न्यायालयाने त्याची रवानगी येरवडा कारागृहात केली. येरवडा कारागृहात न्यायालयीन कोठडीत असलेल्या शशांक हगवणे आणि नीलेश चव्हाण यांना मंगळवारी ताब्यात घेण्यात आले.