ठाणे – सर्वोच्च न्यायालयाचे सरन्यायाधीश भूषण गवई यांच्यावर राकेश तिवारी याने भर न्यायदान कक्षात बूट फेकून मारण्याचा प्रयत्न केला. तसेच, त्याने या कृत्याबद्दल पश्चातापही व्यक्त केला नाही. या निषेधार्थ ठाण्यातील सर्व आंबेडकरी संघटनांनी गुरुवारी कोर्टनाका येथील डाॅ. बाबासाहेब आंबेडकर यांच्या पुतळ्यासमोर जोरदार निदर्शने केली. यावेळी आंबेडकरी संघटनेच्या पदाधिकाऱ्यांनी ठाणे नगर पोलीस ठाण्यामध्ये लेखी फिर्याद देऊन ॲट्रोसिटी आणि देशद्रोहाचा गुन्हा दाखल करण्याची मागणी केली. तसेच सुरूवातीपासूनच राष्ट्रीय स्वयंसेवक संघाने संविधानाला विरोध केला आहे. त्यांच्या शिकवणीमुळेच राकेश तिवारी या वकिलाने हे कृत्य केले आहे, असा आरोप करत संघावर बंदी घालण्याची मागणी देखील केली.
सर्वोच्च न्यायालयात कामकाज सुरू असताना, सोमवारी सरन्यायाधीश भूषण गवई यांच्यावर राकेश तिवारी या वकिलाने बूट फेकण्याचा प्रयत्न केला होता. हा प्रकार म्हणजे संविधानावर हल्ला आहे. सुरूवातीपासूनच राष्ट्रीय स्वयंसेवक संघाने संविधानाला विरोध केला आहे. त्यांच्या शिकवणीमुळेच राकेश तिवारी या वकिलाने हे कृत्य केले आहे, असा आरोप करीत आंबेडकरी चळवळीतील संविधानप्रेमी पक्ष संघटनांच्या कार्यकर्त्यांनी नानासाहेब इंदिसे यांच्या मार्गदर्शनानुसार डाॅ. बाबासाहेब आंबेडकर यांच्या पुतळ्यासमोर निदर्शने केली. यावेळी कार्यकर्त्यांनी संघावर बंदी घालण्याची मागणी केली. संविधानप्रेमी नागरिकांनी तसेच वकिलांनी हातात निषेधाचे फलक घेऊन सरकार आणि संघाच्या विरोधात घोषणाबाजी केली.
यादरम्यान, नानासाहेब इंदिसे म्हणाले की, सरन्यायाधीश म्हणजे, देशाच्या न्यायप्रक्रियेतील सर्वोच्च स्थान आहे. आज तेही सुरक्षित नसतील तर देशातील एकही नागरिक सुरक्षित नाहीत, हेच स्पष्ट होत आहे. हा बूट फेकण्याचा प्रयत्न फक्त न्यायव्यवस्थेवर नव्हता. तर ते बौद्ध समाजातून आलेले असल्यानेच राकेश किशोर याने हे कृत्य केले आहे, असा आरोप केला.
भास्कर वाघमारे यांनी, सरन्यायाधीश भूषण गवई जेव्हा महाराष्ट्रात आले होते. तेव्हा राज्य शासनाने त्यांना प्रोटोकॉल दिला नव्हता. यावरून मागासवर्गीय माणूस सर्वोच्च स्थानी बसल्याचे या लोकांना मान्य नसल्याचेच दिसून येत आहे. या घटनेचा आम्ही निषेध करतो. राजाभाऊ चव्हाण यांनी, भविष्यात असे कृत्य घडू नये, न्यायालयाचे सार्वभौमत्व अखंडित रहावे, यासाठी राकेश किशोर याच्यावर देशद्रोहाचा खटला दाखल करून त्याला तिहार जेलच्या अंडासेलमध्ये टाकावे, अशी मागणी केली.
या आंदोलनात भदंत शिलकिर्ती, संजय मं. गो, जगदीश खैरालिया, उन्मेश बागवे, भैय्यासाहेब इंदिसे, जितेंद्रकुमार इंदिसे, संदीप खांबे, सुखदेव उबाळे, प्रल्हाद मगरे, कैलास हावळे, प्रमोद इंगळे, नंदकुमार मोरे, विमल सातपुते, सुमन इंगळे, तात्याराव झेंडे, प्रभाकर जाधव, बबन केदारे, श्रीकांत कांबळे, अशोक कांबळे, विशाल ढेंगळे, राम म्हसके, बाबा भदर्गे, हनुमान लांडगे, संजय दळवी, पंढरीनाथ गायकवाड, जालिंदर यादव, एड. अवचर, संजय गांगुर्डे, देविदास घोरपडे, एड. एंगडे, आशा शरणागत, एड. गौरेश इंदिसे, मिलींद सातदिवे, किशोर बनकर, नाना मगदूम, भीमराव शिरसाठ हे उपस्थित होते.
