ठाण्यात शिंदेंना ठाकरे बंधूंचे आव्हान? पालिकेवर ठाकरे गट-मनसेचा एकत्रित धडक मोर्चा; आमदार आव्हाड देखील सहभागी…

ठाण्यात ठाकरे गट आणि मनसेने एकत्रित पत्रकार परिषद घेतली. या पत्रकार परिषदेत ठाकरे गटाचे नेते माजी खासदार राजन विचारे, मनसेचे नेते अविनाश जाधव, माजी आमदार राजू पाटील, ठाकरे गटाचे ठाणे जिल्हाप्रमुख केदार दिघे यांच्यासह दोन्ही पक्षाचे पदाधिकारी उपस्थित होते. उपमुख्यमंत्री एकनाथ शिंदे यांनी उद्धव ठाकरे यांची साथ सोडल्यानंतर मुंबई, ठाणे, नाशिकसह महत्त्वाच्या शहरामधील अनेक पदाधिकारी आणि कार्यकर्त्यांनी शिंदे यांच्यासोबत जाण्याचा निर्णय घेतला.

मुंबई महानगरातील मुंबई आणि ठाणे महापालिका महत्त्वाच्या आहेत. या दोन्ही महापालिकांवर शिवसेनेची सत्ता होती. शिवसेनेची सत्ता पहिल्यांदा आली ती ठाणे महापालिकेत. त्यामुळे मुंबई प्रमाणे ठाणे महापालिका देखील शिवसेनेसाठी तितकीच महत्त्वाची आहे. परंतु आता शिवसेनेची दोन शकले पडली आहे. त्यामुळे मनसे आणि उद्धव ठाकरे यांच्या शिवसेनेने एकत्र यावे आणि स्थानिक स्वराज्य संस्थेची निवडणूक लढवावी अशी मागणी त्यांच्या पक्षातील कार्यकर्ते करत आहेत. तर दुसरीकडे भाजपकडून ठाकरे ब्रँडची खिल्ली उडविली जात आहे.

कसा असेल मोर्चा

ठाकरेंच्या शिवसेनेचे नेते राजन विचारे आणि मनसेचे नेते अविनाश जाधव यांनी शुक्रवारी एक संयुक्त पत्रकार परिषद घेतली. हा मोर्चा ठाण्यातील राम गणेश गडकरी रंगायतन येथून सुरु होणार असून तो ठाणे महापालिका मुख्यालयावर धडकणार आहे. शहरातील नागरी समस्या, ठाणे महापालिकेत सुरु असलेला भ्रष्टाचार, वाढती गुन्हेगारी, वाहतुक कोंडी, पाणी प्रश्नामुळे हा मोर्चा काढला जाणार असल्याचे विचारे आणि जाधव यांनी सांगितले.

आव्हाड यांचाही सहभाग?

हा मोर्चा ठाकरे बंधूंनी काढला असला तरी महाविकास आघाडीतील राष्ट्रवादी काँग्रेस (शरद पवार गट) आणि काँग्रेसचे नेते, पदाधिकारीही सहभागी होणार असल्याचा दावा जाधव यांनी केला आहे.