ठाण्यात करोनामुळे तरुणाचा मृत्यू, मधुमेहच्या त्रासामुळे झाला होता रुग्णालयात दाखल

ठाणे महापालिका क्षेत्रात गेल्या तीन दिवसात करोनाचे १० रुग्ण आढळले आहेत. या रुग्णांमध्ये करोनाची सौम्य लक्षणे असून त्यांच्यावर घरीच उपचार सुरू आहेत. ठाणे महापालिका क्षेत्रात करोना विषाणूने पुन्हा डोके वर काढल्याचे चित्र आहे. करोना रुग्ण आढळण्यास सुरूवात झाल्याच्या पार्श्वभूमीवर, ठाणे महापालिका आयुक्त सौरभ राव यांनी शुक्रवारी विभाग प्रमुखांच्या आढावा बैठकीत महापालिका क्षेत्रातील करोना रुग्ण स्थितीची माहिती घेतली. करोना रुग्णांच्या तपासणीसाठी महापालिकेच्या आरोग्य विभागाने तसेच सर्व रुग्णालयांनी सतर्क रहावे, असे निर्देश महापालिका आयुक्त सौरभ राव यांनी दिले होते.

तसेच, कळवा येथे छत्रपती शिवाजी महाराज रुग्णालयात विशेष कक्ष तयार करण्यात आला आहे. असे असतानाच, या रुग्णालयात शनिवारी सकाळी मुंब्रा परिसरात राहणाऱ्या एका २१ वर्षीय तरुणाचा करोनामुळे मृत्यु झाल्याची बाब उघडकीस आली. या वृत्तास ठाणे महापालिकेचे आरोग्य अधिकारी डाॅ. प्रसाद पाटील यांनी दुजोरा देत या तरुणाला मधुमेह आजार असल्याने तो उपचारासाठी दाखल झाला होता, असे त्यांनी स्पष्ट केले. या तरुणाला वयाच्या सातव्या वर्षापासून मधुमेहचा आजार होता. मधुमेह आणि ॲसिडोसिसच्या गुंतागुंतीमुळे उपचारासाठी दाखल झालेल्या या तरुणांच्या फुफ्फुसांमध्ये संसर्ग झाला होता. त्यामुळे त्याची करोना चाचणी करण्यात आली होती. त्याचा अहवाल सकारात्मक आला होता, असे कळवा येथील महापालिकेच्या छत्रपती शिवाजी महाराज रुग्णालयाचे वैद्यकीय अधिक्षक डाॅ. अनिरुद्ध माळगावकर यांनी सांगितले.

या तरुणाला मधुमेहचा आजार होता. या तरुणाला गुरुवारी टाइप वन मधुमेह आणि ॲसिडोसिसच्या गुंतागुंतीमुळे कळवा येथील महापालिकेच्या छत्रपती शिवाजी महाराज रुग्णालयात दाखल करण्यात आले होते. प्रकृती खालावत असल्यामुळे त्याला अतिदक्षता विभागात हलविण्यात आले होते आणि तिथे त्याला कृत्रिम श्वसन यंत्रणेवर ( व्हेंटिलेटर) ठेवण्यात आले होते. शुक्रवारी त्याची करोना चाचणीही करण्यात आली होती. या चाचणीचा अहवाल शुक्रवारी रात्री आला. त्यात त्याला करोनाची लागण झाल्याचे उघड झाले. यानंतर त्याला रुग्णालयातील विलगीकरण कक्षात हलविण्यापुर्वीच त्याचा शनिवारी सकाळी मृत्यु झाला, अशी माहिती रुग्णालयाचे अधिष्ठाता डॉ. राकेश बारोट यांनी सांगितले.