कल्याण – डोंबिवलीतील दोन ज्येष्ठ नागरिकांना शेअर गुंतवणुकीत वाढीव नफ्याचे आमिष दाखवून पाच कोटीचा गंडा घातल्याची घटना ताजी असताना, कल्याणमध्ये एका नोकरदाराला शेअर गुंतववणुकीत ८०० टक्के नफ्याचे आमिष दाखवून तीन जणांनी ऑनलाईन गुंतवणूक माध्यमातून ७१ लाख ३८ हजार ४९० रूपयांची फसवणूक केली आहे.
सुनील रामचंद्र यादव असे फसवणूक झालेल्या नोकरदाराचे नाव आहे. ते कल्याण पश्चिमतील मुरबाड रस्त्यावरील सिंडिकेट भागात राहतात. एप्रिल २०२५ ते जून २०२५ या कालावधीत हा फसवणुकीचा प्रकार घडला आहे. सुनील यादव यांच्या तक्रारीवरून पोलिसांनी रिया, अनुष्का डे आणि यशस्वी शर्मा या इसमांंविरुध्द कल्याण मधील महात्मा फुले पोलीस ठाण्याच्या पोलिसांनी गुन्हा दाखल केला आहे.
सुनील यादव यांनी महात्मा फुले पोलीस ठाण्यातील तक्रारीत म्हटले आहे, की मागील तीन महिन्याच्या काळात गुन्हा दाखल इसमांनी आपल्या मोबाईल क्रमांकाच्या माध्यमातून आपल्याशी संपर्क साधला. व्हाॅट्सपव्दारे विविध प्रकारच्या सहा मोबाईलच्या माध्यमातून आपणास शेअर गुंतवणुकविषयक मार्गदर्शन केले. आपण शेअर गुंतवणुकीत गुंतवणूक केली तर आपणास कमी कालावधीत ८०० टक्के नफा मिळवून देऊ असे आश्वासन दिले.
गुन्हा दाखल इसमांनी तक्रारदार यादव यांना शेअर गुंतवणूक विषयक एक उपयोजन स्वताच्या मोबाईलमध्ये स्थापित करण्यास सांगितले. या उपयोजन माध्यमातून टप्प्याने तिन्ही इसमांनी तक्रारदाराकडून ठराविक रकमा आपल्या बँक खात्यावर वळत्या करून घेतल्या. अशाप्रकारे एकूण ७१ लाख ३८ हजाराची रक्कम तिन्ही जणांनी त्यांनी दिलेल्या विविध बँक खात्यावर जमा करून घेतली.
दरम्यानच्या काळात आपण केलेल्या गुंतवणुकीवर वाढीव नफा जमा झाला आहे, असे तिन्ही जणांनी गुंतवणूकदाराला ऑनलाईन माध्यमातून बनावट पध्दतीने दाखविण्यास सुरूवात केली. काही रक्कम तक्रारदाराने काढण्याचा प्रयत्न केला. त्यावेळी त्यांना विविध कारणे देऊन रक्कम काढून देण्यात अडथळे आणण्यात आले. सततचा तगादा लावूनही तक्रारदाराला वाढीव नफ्याची रक्कम देण्यात गुंतवणूक सल्लाकारांकडून टाळाटाळ केली जात होती.
नफ्याची रक्कम मिळत नसल्याने तक्रारदाराने मूळ रक्कम काढण्याचा प्रयत्न केला. तीही देण्यास इसमांनी विविध कारणे देऊन, अधिकची रक्कम गुंतवणूक करण्यास सांगून नकार दिला. आपणास शेअर गुंतवणुकीतील आमिष दाखवून तिन्ही जणांनी आपल्याकडून रक्कम वसूल केली. त्या रकमेवरील वाढीव नफा आणि मूळ रक्कमही परत न करता आपली आर्थिक फसवणूक केली. याची खात्री पटल्यावर तक्रारादाराने महात्मा फुले पोलीस ठाण्यात तक्रार दाखल केली आहे. पोलीस अधिकारी सोपान नांगरे याप्रकरणाचा तपास करत आहेत.
