लिओनेल मेस्सीला भेटण्याची संधी, ठाणे जिल्ह्यात ‘प्रोजेक्ट महादेवा’ची चर्चा; वाचा कधी होणार निवड चाचण्या!

या निवड चाचण्या नवी मुंबई, नेरुळ येथील यशवंतराव चव्हाण फुटबॉल मैदानावर सकाळी ८ वाजल्यापासून पार पडतील. ही योजना महाराष्ट्र माहिती तंत्रज्ञान संशोधन अकादमी (MITRA) , क्रीडा विभाग, WIFA, सिडको आणि VSTF यांच्या संयुक्त विद्यमाने राबविण्यात येत आहे. राज्यातील फुटबॉल क्षेत्र अधिक मजबूत करण्याचा यामागचा उद्देश आहे. इच्छुक खेळाडूंनी निवड चाचण्यांपूर्वी दिलेल्या गूगल फॉर्मद्वारे ३० ऑक्टोबर पर्यंत नोंदणी करणे आवश्यक आहे.

जिल्हास्तरावरील निवड चाचण्या, प्रादेशिक फेरी आणि अंतिम निवड फेरी अशा तीन टप्प्यात या निवड प्रक्रिया पार पडणार आहेत.अंतिम टप्प्यात ६० मुलांची निवड सीआयडीसीओ ग्राऊंड, खारघर येथे आणि ६० मुलींची निवड डब्ल्यूआयएफए कूपरेज मैदान, मुंबई येथे केली जाईल. यापैकी प्रत्येकी ३० मुलगा‑मुलींची निवड केली जाईल आणि त्यांना पाच वर्षांची एकात्मिक शिष्यवृत्ती दिली जाणार आहे. ज्यामध्ये फुटबॉल प्रशिक्षणासोबत शैक्षणिक विकासाचाही समावेश असेल.

आंतरराष्ट्रीय फुटबॉल खेळाडू मेस्सी ला भेटण्याची संधी

निवड झालेल्या खेळाडूंना १४ डिसेंबर रोजी मुंबईत येणाऱ्या आंतरराष्ट्रीय फुटबॉल स्टार लिओनेल मेस्सी यांच्या फुटबॉल क्लिनिकमध्ये सहभागी होण्याची अनोखी संधी मिळेल.

या गुगल लिंकवर नोंदणी करावी

या निवड चाचणी मध्ये सहभागी होण्याकरिता खेळाडूंनी https://forms.gle/1mwckj3XokoRQbb98 या गुगल लिंक द्वारे नोंदणी करणे आवश्यक आहे.

निवड चाचणी निकष आणि पात्रता

• १) सर्व खेळाडूंनी चाचणी स्थळी येण्यापूर्वी गुगल नोंदणी लिंकद्वारे आपली नोंदणी पूर्ण करणे आवश्यक आहे.
• २) या निवड चाचणी मध्ये १ जानेवारी २०१२ रोजी किंवा त्यानंतर जन्मलेले आणि ३१ डिसेंबर २०१३ रोजी किंवा त्यापूर्वी जन्मलेले खेळाडू सहभागी होवू शकतील.
• ३) सर्व खेळाडूंनी त्यांचे मूळ आधार कार्ड आणि जन्म प्रमाणपत्र सोबत घेऊन येणे आवश्यक आहे. (रंगीत झेरॉक्स किंवा मोबाईलवरील सॉफ्ट कॉपी स्वीकारली जाणार नाही.)
• ४) खेळाडूच्या जन्म तारखेपासून एक वर्षानंतर जन्म प्रमाणपत्रावर नोंदणीची तारीख असल्यास, तो खेळाडू स्पर्धेत भाग घेण्यासाठी अपात्र ठरेल.
• ५) खेळाडूचा पत्ता ठाणे जिल्ह्यातीलच असावा.
• ६) ठाणे जिल्हास्तर निवड चाचणीत सर्वोत्तम कामगिरी करणाऱ्या पहिल्या २० खेळाडूंची निवड ही विभागस्तरीय निवड चाचणीसाठी करण्यात येईल.

खेळाडूंना आवाहन

हा कार्यक्रम अत्यंत महत्वाचा असून, राज्यातील फुटबॉल खेळाला नवी दिशा देणारा आहे.महादेवा या महत्त्वाकांक्षी योजनेत जास्तीत जास्त खेळाडूंनी सहभाग घ्यावा, असे आवाहन जिल्हा क्रीडा अधिकारी सुवर्णा बारटक्के यांनी केले आहे.