Robbery News: कल्याणमधील घोडेखोत आळीतील दक्षिणमुखी हनुमान मंदिरात चोरी

सलमान मोहम्मद अख्तर अन्सारी असे चोरट्याचे नाव आहे. या चोरीप्रकरणी घोडेखोत आळीतील रहिवासी दीपेश अशोक देशमुख यांनी बाजारपेठ पोलीस ठाण्यात तक्रार केली आहे. पोलिसांनी या तक्रारीवरून सलमान अन्सारी विरुध्द गुन्हा दाखल केला आहे.

कल्याण पश्चिमेतील घोडेखोत आळीतील दक्षिणमुखी श्री हनुमान मंदिर हे प्रसिध्द आणि ऐतिहासिक आहे. अनेक भाविक दररोज याठिकाणी दर्शनासाठी येतात. मंदिराचे व्यवस्थापन स्थानिक पुजारी करतात. सकाळी पुजेसाठी उघडलेले मंदिर रात्री आरती झाल्यानंतर बंद केले जाते. मंदिरात दर्शनासाठी आलेले भाविक दानपेटीत स्वेच्छेने पैसे टाकतात. बुधवारी रात्री नेहमीप्रमाणे पुजाऱ्याने दक्षिणमुखी मारूती मंदिराचे मुख्य प्रवेशव्दार कुलुप लावून बंंद केले.

मंदिरातील दानपेटी आणि काही किमती ऐवजावर मोहम्मद अन्सारी हा चोरटा लक्ष ठेऊन होता. बुधवारी मध्यरात्री तीन वाजण्याच्या दरम्यान मोहम्मदने धारदार कटावणीने हनुमान मंदिराच्या बाहेरील भागातील मंदिराच्या संरक्षिततेसाठी असलेली स्टीलची जाळी तोडली. त्याने मंदिरात प्रवेश केला. मंदिरातील मुख्य गर्भगृहाला लाकडी दरवाजा आहे. हा दरवाजा मंदिर रात्री बंद करताना कुलुपबंद केला जातो.

मोहम्मदने चोरीसाठी या लाकडी दरवाजाचे कुलुप जवळील धारदार कटावणीने तोडले. लाकडी दरवाजाचा कडीकोयंडा तुटल्यामुळे दरवाजा उघडला. चोरट्याने गाभाऱ्यातील आरतीचे ताम्हण, कलश, पुजेसाठी आवश्यक असणारी तांबा, पितळेची भांडी गोळा केली. गाभाऱ्यातील पुजेसाठी लागणारे सामान त्याने विस्कळीत करून त्यात कोठे सोने, चांदीचा किमती ऐवज मिळतो का याची चाचपणी केली. त्यानंतर मोहम्मद अन्सारीने हनुमान मंदिर मूर्तीसमोरील दानपेटीचे कुलुप तोडले. दानपेटीतील दोन हजाराहून अधिक रकमेची दक्षिणा त्याने गोळा करून ती एका पिशवीत टाकली.

पुरेसा ऐवज हाती लागल्यानंतर मोहम्मद चोरी करून हनुमान मंदिरातून बाहेर पडत होता. त्याचवेळी त्याला जागरूक नागरिकांनी रात्रीच्या वेळेत काय करतो म्हणून हटकले आणि तो चोरी करून पळत आहे याची जाणीव झाल्यावर जागरूक नागरिकांनी त्याला पकडले. बाजारपेठ पोलिसांना ही माहिती दिल्यावर पोलीस तातडीने घटनास्थळी आले. पंचनामा करून मोहम्मदला पोलीस ठाण्यात नेऊन त्याची चौकशी करण्यात आली. हवालदार सोनार याप्रकरणाचा तपास करत आहेत.

कल्याण, डोंबिवली हद्दीत अलीकडे मंदिरांंमधील दानपेट्यांमधील रक्कम चोरण्याचे प्रमाण वाढले आहे. त्यामुळे मोहम्मदने इतर काही मंदिरांमध्ये चोरी केली आहे का याचा तपास पोलिसांनी सुरू केला आहे.