ठाणे – नगरविकास विभागाने नगर रचना आणि मूल्यनिर्धारण विभागातील आठ सहायक संचालकांना उपसंचालक (नगररचना) पदावर पदोन्नती दिली आहे. या यादीत ठाणे महापालिकेत कार्यरत असलेले सहायक संचालक (नगररचना) संग्राम कानडे यांचाही समावेश असून, त्यांच्या पदस्थापनेचे आदेश लवकरच जारी करण्यात येणार आहेत.
संग्राम लहू कानडे हे माजी आमदार लहू कानडे यांचे सुपुत्र असून यापूर्वी त्यांनी पालघर, नाशिक येथे यशस्वीपणे काम केले आहे. पालघर येथे सहायक संचालक पदी काम करताना त्यांनी वाडा, जव्हार, मोखाडा, तलासरी आणि विक्रमगड या शहरांचा विकास योजना आराखडा तयार केला होता व त्यासाठी शासनाने “ स्वराज्य अभियंता हिराजी इंदुलकर -२०२३“ हा पुरस्कार मुख्यमंत्री व उपमुख्यमंत्री यांचे हस्ते त्यांना देऊन त्यांचा सन्मान केला होता.
ठाणे महानगरपालिका येथे काम करताना त्यांनी सर्वांना सोबत घेऊन विविध उपक्रम राबवले, यामध्ये बुलेट ट्रेन स्टेशन एरिया प्लॅनिंग करिता सर्व घटकांना सामावून घेऊन नियोजन करण्यासाठी आंतरराष्ट्रीय स्तरावरील सेमीनार आयोजित केला. तसेच ठाणे शहराची विकास योजना देखील त्यांच्या कार्यकाळात शासनाकडे मंजुरीसाठी सादर करण्यात आली आहे. याचबरोबर त्यांनी शहर विकास विभाग अधिक पारदर्शी काम करेल यासाठी सातत्याने प्रयत्न केले.
मंत्रालयात अवर सचिव म्हणून काम करणारे प्रणव कर्वे यांनाही या आदेशानुसार उपसंचालक नगररचना पदी पदोन्नती दिली असून त्यांना मंत्रालयातच उपसचिव नगरविकास विभाग या पदी पदस्थापना देण्यात आली आहे. तसेच महेंद्र परदेशी यांना उपसंचालक नगररचना या पदी संचालक नगररचना या कार्यालयात पदस्थापना देण्यात आली आहे.
