Mumbai Local Video: मुंबईकरांची जीवनवाहिनी म्हणून ओळखल्या जाणाऱ्या मुंबई लोकलमधून दररोज लाखो लोक प्रवास करत असतात. आपल्या स्वप्नपूर्तीसाठी ठिकठिकाणाहून लोक मुंबईत येतात आणि मुंबईचेच होऊन जातात. या धकाधकीच्या जीवनात दर दिवशी लोकलमध्ये काहीतरी नवीन पाहायला मिळतं. अशात लेडीज डब्यातही रोज नवनवीन गोष्टी घडत असतात.
दररोज सकाळी कामावर जाणाऱ्यांची लगबग आणि धक्काबुक्की करत ‘आत खूप जागा आहे’, असं म्हणत मुंबई लोकलमध्ये दर दिवशी असंख्य माणसांची गर्दी पाहायला मिळते. दररोजच्या या लोकल प्रवासाची अनेकांना सवय झालेली असते. अशात घर सांभाळून नोकरीसाठी महिला अगदी आपल्या जीवाची पर्वा न करता, लोकलमधून प्रवास करतात. अगदी दरवाजाला लटकून त्यांचा जीवघेणा प्रवास सुरू असतो.
सध्या मुंबई लोकलचा असाच एक व्हिडीओ सोशल मीडियावर व्हायरल होतोय, ज्यात भरगच्च लोकलमधून दरवाजाला लटकून महिला प्रवास करतायत. तर काहींना गर्दीमुळे आत शिरायलाही जागा दिसत नाहीय.
मुंबई लोकल व्हायरल व्हिडीओ (Mumbai Train Video)
सोशल मीडियावर व्हायरल झालेल्या या व्हिडीओमध्ये भरगच्च ट्रेनमध्ये महिला दरवाजाला लटकूनच प्रवास करताना दिसतायत. लोकलमध्ये अफाट गर्दी असूनही महिला आपल्या जीवाची पर्वा न करता, कामाला जाण्यासाठी याच गर्दीतून दररोज प्रवास करतात. काही जणी तर ट्रेनच्या दरवाजाला लटकून प्रवास करतात. ट्रेनला लटकल्यामुळे अपघात झाल्याचे आपण अनेकदा ऐकतही असतो. पण, या महिला आपली ओळख निर्माण करण्यासाठी जीव मुठीत घेऊन या लोकलने प्रवास करतात.
सोशल मीडियावर व्हायरल झालेला व्हिडीओ या @creation_by_vik या इन्स्टाग्राम अकाउंटवरून शेअर करण्यात आला असून, या व्हिडीओला ‘घरच्यांना वाटतं मुलगी कमवतेय; पण ती कशी कमवतेय हे माहीत नसतं’, अशी कॅप्शन देण्यात आली आहे. तसेच व्हिडीओ व्हायरल होताच याला ६.९ दशलक्ष व्ह्युज आले आहेत.
युजर्सच्या प्रतिक्रिया
सोशल मीडियावर व्हिडीओ व्हायरल होताच अनेकांनी यावर आपल्या प्रतिक्रिया दिल्या आहेत. एका युजरनं कमेंट करत लिहिलं, “एवढं करूनही बोलतात की, ती करतेच काय, फक्त लॅपटॉप घेऊनच तर बसते”. तर दुसऱ्यानं, ”मुलींच्या आयुष्यात खूप स्ट्रगल असतो. तरीही त्या स्वत:च्या पायावर उभं राहण्याचा प्रयत्न करतात”, अशी कमेंट केली. तर तिसऱ्यानं “एकदम खरी गोष्ट आहे”, अशी कमेंट केली. तर एक जण कमेंट करत म्हणाला, “मुली खूप हिंमतवान असतात.”
