मुंबईत काल वादळाची धूळ ‘या’च मैदानातून आली म्हणत प्रचंड व्हायरल होतोय Video; भावाने दाखवली चक्रीवादळाची झलक

आदेश राऊत या इन्स्टाग्राम अकाउंटवर हा व्हिडीओ शेअर करण्यात आला होता. व्हिडीओवर १३ मे २०२४ अशी तारीख सुद्धा दिसतेय. मुंबईतील एका मैदानालगतच्या रहिवाशी इमारतीमधूनच हा व्हिडीओ शूट करण्यात आला होता. घराच्या खिडकीतून एक कुटुंब आपल्या घराखालील मैदानात धुळीचं चक्रीवादळ तयार होताना पाहत असल्याचं तुम्हाला या व्हिडीओमध्ये दिसेल. सुरुवातीला प्रचंड वेगाने वाहणाऱ्या वाऱ्यांमुळे मैदानातील लाल माती गोल गोल फिरून वर उडू लागते. हळूहळू चक्रीवादळासारखा वेग ही उडणारी धूळ माती धारण करते. हे बघताना साहजिकच आपल्याही मनात जी उत्सुकता असेल तीच हा व्हिडीओ शूट करणाऱ्याच्या तोंडून ऐकायला मिळते. खाली मैदानात अन्य लहान मुलं आपला जीव मुठीत धरून पळताना सुद्धा दिसत आहेत.

दरम्यान, हा व्हिडीओ पोस्ट केल्यापासूनच प्रचंड व्हायरल झाला आहे. विशेष म्हणजे शूट करणाऱ्याची उत्सुकता पाहून नेटकरी लोटपोट झाले आहेत. काहींनी तर उडणाऱ्या धुळीचे प्रमाण पाहता नक्की काल मुंबईत जेवढी धूळ आली ती सगळी इथूनच आली असावी असा अंदाजही अनेकांनी बांधला आहे. तर काहींनी मस्करीत, ” भावा तू मोरापेक्षा जास्त आनंदी दिसतोय”, “भावा तू वादळाला गाणी लावून स्वतःचा वेगळाच माहोल तयार केलायस असं म्हणत मजेशीर कमेंट्स केल्या आहेत.

काहींनी तर ही मोदी सरकारच्या विजयाची सुरुवात आहे असं म्हणत आपली वेगळीच क्रिएटिव्हिटी या कमेंट बॉक्समध्ये दाखवली आहे. तर काहींनी आता गणपती येणार असल्याने निसर्ग स्वच्छतेला सुरुवात करतोय असं म्हणत अगदी भोळ्या भाबड्या कमेंट्स सुद्धा केल्या आहेत.

हे ही वाचा<< घाटकोपरमध्ये कोसळलेल्या होर्डिंगविषयी BMC चा मोठा खुलासा; परवानगी कुणी दिली, खरा दोष कुणाचा?

दरम्यान, या गोष्टीकडे गांभीर्याने पाहिल्यास, मुंबईत सोमवारी धडकलेलं वादळ हे अनेक कुटुंबासाठी काळाचा हल्ला ठरलं. घाटकोपरमधील पंतनगर भागात या वादळी वाऱ्यांमुळे कोसळून पडलेल्या मोठ्या होर्डिंगमुळे तब्बल १४ जणांना आपले प्राण गमवावे लागले. अनेकजण जखमी झाले असून त्यांच्यावर अजूनही उपचार चालू आहेत.