Viral Video: पूर्वी लग्नसराई म्हटलं की, शुभ मुहूर्त, मानपान, लग्नातील विधी यांकडे अधिक लक्ष दिलं जायचं. परंतु, आताच्या लग्नांमध्ये लग्नातील वधू-वराच्या एन्ट्रीचे डान्स, भन्नाट उखाणे, फोटो, व्हिडीओ यांकडे अधिक लक्ष दिलं जातं. सध्या लग्नसराईचे दिवस सुरू असल्यानं सोशल मीडियावरही लग्नातील अनेक हटके रील्स, व्हिडीओ व फोटो सतत व्हायरल होत असतात. या व्हायरल होणाऱ्या व्हिडीओंमध्ये लग्नातील अनेक गमतीजमती, अनोख्या प्रथा, हटके उखाणे आपल्याला पाहायला मिळतात. सध्या असाच एक व्हिडीओ मोठ्या प्रमाणात व्हायरल होत आहे, ज्यात नवरा-नवरी लग्नाच्या एंट्रीला विठू-माऊलीचा गजर करताना दिसत आहेत.
लग्न प्रत्येक व्यक्तीच्या आयुष्यात खूप सुंदर आणि आयुष्य बदलणारा क्षण असतो. त्यामुळे या दिवशी वधू आणि वर त्यांच्या आयुष्यभर लक्षात राहतील अशा गोष्टी करण्याचा प्रयत्न करतात. सुंदर कपडे, दागिने, मेकअप यांसह डान्स, फोटोशूट अशा अनेक गोष्टींची आधीपासून तयारी केली जाते. आजपर्यंत अनेक लग्नांमधील काही हटके गोष्टी सोशल मीडियावर मोठ्या प्रमाणात व्हायरल झाल्याचे आपण पाहिल्या असतील. आतादेखील असाच एक व्हिडीओ सोशल मीडियावर व्हायरल होतोय. त्यात हे नवविवाहित जोडपं कोणत्याही रोमँटिक गाण्यावर डान्स न करता टाळ-मृदंगाच्या गजरात नाचत आहे.
या व्हायरल व्हिडीओमध्ये तुम्ही पाहू शकता की, नवविवाहित वर-वधू सर्वांसमोर एन्ट्री घेत असताना त्यांच्या दोन्ही बाजूला पांढऱ्या धोतर-सदऱ्यातील काही लहान मुलं गळ्यात टाळ घेऊन विठुमाऊलीच्या नावाचा गजर करीत नाचताना दिसत आहेत. यावेळी वर-वधूदेखील गळ्यात टाळ घेऊन ठेका धरतात. त्यांचा हा व्हिडीओ सोशल मीडियावर खूप व्हायरल होत आहे.
पाहा व्हिडीओ:
हा व्हिडीओ इन्स्टाग्रामवरील @chitragupt_events या अकाउंटवरून शेअर करण्यात आला आहे. त्याला आतापर्यंत अनेक पाच दशलक्षांहून अधिक व्ह्युज आणि चार लाखांहून अधिक लाइक्स मिळाल्या आहेत. तसेच यावर अनेक युजर्स कमेंट्स करताना दिसत आहेत.
एकानं लिहिलंय, “आयुष्यात बघितलेली सर्वांत सुंदर एन्ट्री”. दुसऱ्यानं लिहिलंय, “राम कृष्ण हरी खूप छान मला खूप आवडलं”. आणखी एकानं लिहिलंय, “अशीच पाहिजे एन्ट्री”.
