लाचखोर सरकारी वकील जाळय़ात

लाचलुचपत प्रतिबंधक विभागाच्या पथकाने निलंगा येथे २ हजार रुपयांची लाच स्वीकारताना सहायक सरकारी वकिलास पकडले.
निलंगा येथील आनंदनगर भागातील मंदोधरा माधव केंद्रे (वय ३७) यांना निलंगा न्यायालयातील सहायक सरकारी वकील अरुण शिवाजीराव पाटील (वय ४५) याने उच्च न्यायालयात अपील दाखल करण्याच्या कामासाठी २ हजार रुपयांची लाच मागितली होती. केंद्रे यांच्या दाखल प्रकरणात न्यायालयाने आरोपीच्या बाजूने निकाल दिला होता. या प्रकरणी आरोपीविरुद्ध उच्च न्यायालयात अपील दाखल केले. या कामाचे बक्षीस म्हणून सरकारी वकील पाटील याने लाच मागितली होती. केंद्रे यांच्या तक्रारीवरून लाचलुचपत विभागाने सापळा रचला. पाटीलला पंचासमक्ष लाच घेत असताना पकडण्यात आले.