विहिरीचे खोदकाम सुरू असताना क्रेनची तार तुटल्याने त्याखाली दबून दोन मजुरांचा मृत्यू झाला. बीड तालुक्यातील अंबीलवडगाव येथे शनिवारी हा दुर्दैवी प्रकार घडला. अंबिलवडगाव येथे अशोक तांदळे यांच्या विहिरीचे खोदकाम सुरू होते. त्या ठिकाणी ७ मजुरांसह क्रेनच्या साह्य़ाने विहिरीतील माती बाहेर काढण्यात येत होती. या वेळी क्रेनची तार तुटून त्याचे पाटे विहिरीत पडले. त्याखाली दबून बिभीषण दगडू वाघमारे (वय ४५, जानकापूर, तालुका वाशी) व ित्रबक मुरलीधर खराडे (वय ४५, अंबिलवडगाव) या दोघांचा मृत्यू झाला. घटनेनंतर या ठिकाणी असलेल्या अन्य मजुरांसह ग्रामस्थांनी दोघांचे मृतदेह बाहेर काढून नेकनूर ग्रामीण रुग्णालयात शवविच्छेदनासाठी दाखल केले. या घटनेची पोलिसांत नोंद करण्यात आली.
