चीनमध्ये स्टाफ मीटिंग सुरु असताना अचानक छतावरुन पाच फूट अजगर खाली पडल्याने कर्मचाऱ्यांची एकच धावपळ सुरु झाली. एका बँकेच्या कर्मचाऱ्यांची ही मीटिंग सुरु होती. मीटिंगमध्ये अचानक अजगर घुसल्याने कर्मचारी प्रचंड घाबरले. काही कल्पना नसताना अजगर अचानक छतावरुन दोन कर्मचाऱ्यांच्या मधोधम पडला. यानंतर घाबरलेले कर्मचारी जागा मिळेल तेथून पळत सुटले. हा सर्व प्रकार सीसीटीव्हीत कैद झाला आहे. या पाच फूट अजगराचं वजन पाच किलो होतं. एबीसी न्यूजने दिलेल्या वृत्तानुसार, शुक्रवारी चीनच्या इंडस्ट्रीयल अॅण्ड कमर्शिअल बँकेत ही घटना घडली. अजगराचा हा व्हिडीओ सोशल मीडियावर व्हायरल झाला असून थोड्याच वेळात व्हिडीओला लाखो व्ह्यूज मिळाले आहेत. बँकेच्या कर्मचाऱ्यांनी यानंतर वनविभागाच्या अधिकाऱ्यांना बोलावलं. त्यांनी अजगराला ताब्यात घेऊन जंगलात सोडलं आहे. एखाद्या पक्षाने अजगराला पकडून इमारतीत आणलं असावं अशी शक्यता बँक कर्मचाऱ्यांकडून व्यक्त केली जात आहे.
