पंतप्रधान नरेंद्र मोदी येत्या काही दिवसांत श्रीनगर येथे इफ्तार पार्टी देणार असल्याचे वृत्त आहे. येत्या 17 जुलै रोजी एका कार्यक्रमानिमित्त मोदी जम्मूला जाणार आहेत, त्यानंतर इफ्तार पार्टीसाठी श्रीनगर येथे जाणार असल्याचे समजते. रमजानच्या दिवसांत मुस्लिम बांधवांकडून अशाप्रकारच्या इफ्तार पार्टीचे आयोजन करण्यात येते. हेच निमित्त साधून रमजान ईदच्या आदल्यादिवशी मोदी श्रीनगरमध्ये ही इफ्तार पार्टी देणार असल्याचे समजते. गेल्यावर्षी ऐन दिवाळीत काश्मीरमध्ये आलेल्या प्रलयंकारी पुरानंतर नरेंद्र मोदी यांनी श्रीनगरमध्ये काही दिवस व्यतित केले होते. गेल्या काही दिवसांतील घटनांमुळे भाजपच्या हिंदुत्ववादी प्रतिमेविषयी टीकेचा सूर उमटताना दिसत आहे. या पार्श्वभूमीवर नरेंद्र मोदींचे हे पाऊल महत्त्वपूर्ण राजकीय खेळी ठरण्याची शक्यता वर्तवली जात आहे.