CM योगींनी केलेल्या ‘अब्बा जान’च्या वक्तव्यावरून राजकीय वातावरण तापलं ; कपिल सिब्बल म्हणाले…

उत्तर प्रदेशमध्ये विधानसभा निवडणुकीच्या पार्श्वभूमीवर सर्वच राजकीय पक्षांनी कंबर कसली असून, आरोप-प्रत्यारोप सुरू झाले आहेत

(प्रातिनिधिक छायाचित्र)

आगामी काळात उत्तर प्रदेश विधानसभा निवडणुकीच्या पार्श्वभूमीवर राजकीय वातावरण गरम होऊ लागले आहे. सर्वच राजकीय पक्षांनी या निवडणुकीसाठी कंबर कसली असून, आरोप-प्रत्यारोप सुरू झाले आहेत. दरम्यान, उत्तर प्रदेशचे मुख्यमंत्री योगी आदित्यनाथ यांनी केलेल्या ‘अब्बा जान’ या टिप्पणीवरून आता राजकीय वादंग सुरू झाल्याचे दिसत आहे. काँग्रेस नेते कपिल सिब्बल यांनी यावरून मुख्यमंत्री योगी आदित्यनाथ यांच्यावर टीका केली आहे.

“आमच्या सरकारला हवे आहे : एक सर्वसमावेशक अफगाणिस्तान. त्यांच्या “अब्बा जान” टिप्पणीसह योगींना काय हवे आहे: एक सर्वसमावेशक यूपी किंवा विभाजित करा आणि राज्य करा?” असं ट्विट कपिल सिब्बल यांनी केलं आहे.

मुख्यमंत्री योगी आदित्यनाथ यांनी काल (रविवार) कुशीनगरमध्ये विकास कामांच्या उद्घाटन कार्यक्रमांमध्ये विरोधी पक्षांवर विशेषकरून समाजवादी पार्टी (सपा)वर निशाणा साधला आणि आरोप केला की, समाजवादी पार्टीचे सरकार गरिबांचे रेशन खाते व त्यांना मरू देते. अब्बा जान म्हणणाऱ्या एका समुदायास फायदा पोहचवत होते. २०१७ च्या अगोदर गरिबांना रेशन का नव्हते मिळत? कारण तेव्हा राज्य सरकार चालवणारे आणि माफिया गरिबांचे रेशन खात होते आणि लोक उपाशी मरत होते व त्यांचे रेशन नेपाळ आणि बांगलादेशपर्यंत पोहचत होतं. आज गरिबाचं रेशन कुणीच नाही घेऊ शकत, घेतलं तर तुरूंगात नक्कीच जाईल.

उत्तर प्रदेशमध्ये पुढील वर्षाच्या सुरूवातीस विधानसभा निवडणूक आहे. या पार्श्वभूमीवर भाजपा, काँग्रेस, सपा आणि बसपा या प्रमुख पक्षांसह अन्य पक्ष सक्रीय झाले आहेत. २०१७च्या विधानसभा निवडणुकीत भाजपाने ३१२ जागांवर विजय मिळवला होता. ४०३ सदस्य संख्या असलेल्या विधानसभा निवडणुकीत ३९.६७ टक्के मत मिळवले होते, समाजवादी पार्टीला ४७, बसपाला १९ तर काँग्रेसला केवळ सात जागांवर विजय मिळवता आला होता.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

Web Title: Kapil sibal criticizes cm yogis statement abba jaan msr

ताज्या बातम्या