करोनाची धास्ती! किती ऑक्सिजन, आयसीयू, व्हेंटिलेटर बेड्स उपलब्ध? केंद्राने दिली महत्त्वपूर्ण माहिती

सोमवार आणि मंगळवारी देशभर दोन दिवसीय मॉक ड्रिल पार पडले. यामुळे देशभरात उपलब्ध असलेल्या वैद्यकीय सामुग्री, उपकरणांची माहिती मिळाली आहे. यानुसार देशात जवळपास ९० टक्के आयसोलेशन, ऑक्सिजन, आयसीयू बेड्स केवळ करोना रुग्णांवर उपचार करण्याकरता उपलब्ध असल्याचं स्पष्ट झालं आहे. इंडियन एक्स्प्रेस संकेतस्थळाने दिलेल्या माहितीनुसार, २.८ लाख आयसोलेशन बेड्स, ३.०४ लाख ऑक्सिजन बेड्स, ५४ हजार आयसीयू बेड्स आणि व्हेंटिलेटर करोना रुग्णांवर उपचार करण्याकरता उपलब्ध आहेत.

हेही वाचा – भारतात करोना संसर्ग का वाढतोय? इंडियन मेडिकल असोसिएशनने सांगितली तीन कारणं

किती वैद्यकीय उपकरणे उपलब्ध?

देशभरात एकूण २.४८ लाख आयसोलेशन बेड्स असून, त्यापैकी २.१८ लाख म्हणजेच जवळपास ८७.९ टक्के बेड्स केवळ करोना रुग्णांवर उपचार करण्याकरिता उपलब्ध आहेत. तर, देशात एकूण ३.३५ लाख ऑक्सिजन बेड्स असून त्यापैकी ३.०४ लाख म्हणजेच जवळपास ९०.७ टक्के करोना रुग्णांसाठी वापरण्यात येणार आहेत. आयसीयू बेड्स ९४ हजार ९९९ असून यापैकी ९० हजार ७८५ (९५.५ टक्के) बेड्स करोना रुग्णांसाठी उपलब्ध आहेत. तसेच आयसीयू बेड्ससह व्हेंटिलेटरचीही सज्जता ठेवण्यात आली आहे. देशात ६० हजार ९९४ आयसीयू बेड्ससह व्हेंटिलेटर उपलब्ध असून त्यापैकी ५४ हजार ४० (८८.५ टक्के) करोना रुग्णांच्या उपचारांसाठी वापरण्यात येणार आहे. तसंच, देशभरात ११ हजार ३४४ प्रेशर स्विंग अॅडजोपर्शन ऑक्सिजन प्लांट्स (Pressure Swing Adsorption oxygen plants) उपलब्ध असून ६.८५ लाख ऑक्सिजन सिलिंडर्स आणि २.६१ लाख ऑक्सिजन कॉन्सेट्रेटर्सचीही (oxygen concentrators) सज्जता ठेवण्यात आली आहे.

गेल्या २४ तासांत भारतात १० हजार १५८ कोरोना रुग्णांची वाढ झाली असून सध्या देशात ४४ हजार ९९८ रुग्णांवर उपचार सुरू आहेत. या नव्या रुग्णसंख्येमुळे पॉझिटीव्हिटी रेट ४.४२ टक्के झाला आहे. तर आठवड्याचा पॉझिटिव्हिटी रेट ४.०२ टक्के असून एकूण अॅक्टिव्ह रुग्णांचं प्रमाण ०.१० टक्के आहे.