महायुतीत नाशिकचा तिढा सुटेना, आता छगन भुजबळांचं मोठं विधान; म्हणाले, “आमचा दावा…”

छगन भुजबळ काय म्हणाले?

“मी निवडणूक लढवावी, असा कार्यकर्त्यांचा आग्रह आहे. त्यांचे म्हणणे मी ऐकून घेतले. समता परिषदेच्या कार्यकर्त्यांचे जे प्रेम आहे, ते मला मान्य आहे. ते आमचे सहकारी असून त्यांचा मी आदर करतो. राजकारणामध्ये वेगवेगळे फॅक्टर काम करत असतात. वेगवेगळे विषय पुढे येत असतात. वेगवेगळ्या अडचणी पुढे येत असतात. पण मी तो (लोकसभा न लढवण्याचा) निर्णय घेतला आहे”, असे छगन भुजबळ म्हणाले.

quiziframe id=30 dheight=282px mheight=417px

भुजबळ पुढे म्हणाले, “आयुष्यात मी फक्त एकदा मुंबई महानगरपालिकेच्या नगरसेवक पदासाठी बाळासाहेब ठाकरे यांच्याकडे तिकीट मागितले होते. त्यानंतर मला कधी तिकीट मागण्याची वेळ आली नाही. त्यानंतर मी अनेकांना तिकीट वाटत गेलो. यावेळी दिल्लीच्या काही नेत्यांची मागणी होती, तुम्ही उभे राहा. त्यामुळे आपण तयारीला लागलो होतो. पण त्यांच्यासमोर काही अडचणी आल्या असतील. त्यामुळे तीन-चार आठवड्यानंतर सगळे प्रश्न सुटले पण नाशिकचा तिढा सुटत नाही”, असे भुजबळ यांनी सांगितले.

हेही वाचा : “मी पक्षाचा संस्थापक सदस्य, अजित पवारांना पक्षातून काढून टाकू शकतो”; ‘या’ नेत्याने दिला इशारा

भुजबळ नाराज आहेत का?

छगन भुजबळ नाराज असल्याची चर्चा आहे, यावर प्रश्नावर भुजबळ म्हणाले, “मी कसा नाराज असेल? आयुष्यात अनेक गोष्टी येतात आणि अनेक गोष्टी जातात. जो मिल गया उसी को मुक़द्दर समझ लिया, जो खो गया उसको भुला कर चला गया, मै जिंदगी का साथ निभाता चला गया”, अशी शायरी म्हणत छगन भुजबळ यांनी प्रतिक्रिया दिली.

नाशिकच्या जागेबाबत आमचा दावा?

“नाशिकच्या जागेवर आमचा दावा कायम आहे. आमच्याकडे अनेक उमेदवार आहेत. माजी खासदार देविदास पिंगळे, आमदार माणिकराव कोकाटे, महिलांमध्ये जिल्हाध्यक्षा बलकवडे मॅडम यांच्यासह अनेक उमेदवार आहेत. तसेच भाजपाकडेही अनेक उमेदवार आहेत. भाजपाकडे तीन आमदार, दिनकर पाटील, शांतिगिरी महाराज तर शिंदे गटाकडे हेमंत गोडसे, अजय बोरस्ते असे अनेक आहेत. मात्र, महायुतीचा जो उमेदवार असेल त्याच्या प्रचारासाठी आपण काम करणार आहोत”, असे छगन भुजबळ यांनी सांगितले.

हेमंत गोडसेंनी गोड बातमी द्यावी

“महायुतीमधील तिन्ही पक्षांकडे निवडणूक लढू शकतात असे अनेक उमेदवार आहेत. मात्र, लवकर निर्णय घेण्याची गरज आहे. कारण विरोधी उमेदवाराच्या प्रचाराची एक फेरी पूर्ण झाली आहे.” दरम्यान, हेमंत गोडसे यांनी मुख्यमंत्री एकनाथ शिंदे यांची भेट घेतली. त्यानंतर त्यांचे म्हणणे आहे की, त्यांचे नाव फायनल झाले असून लवकरच घोषणा होईल. त्यावर छगन भुजबळ म्हणाले, “गोडसेंनी आम्हाला गोड बातमी द्यावी.”