मराठी व इंग्रजी माध्यम वगळता इतर भाषांमधील अकरावी- बारावीच्या पुस्तकांच्या भाषांतर आणि प्रकाशनाचा अधिकार खासगी प्रकाशकांना देण्याचा महत्त्वपूर्ण निर्णय राज्य शिक्षण मंडळाने घेतला आह़े त्यामुळे आता इतर भाषांतील विद्यार्थ्यांना खासगी प्रकाशनांचाच आधार उरला आह़े
अन्य प्रादेशिक भाषांमधून भाषेतर विषयांची पाठय़पुस्तके वेळेत प्रकाशित करण्यात मंडळाला वारंवार अडचणी येत आहेत. त्यातच मंडळाने २०१२- १३ पासून अकरावीची तर २०१३-१४ पासून बारावीची पाठय़पुस्तके ‘राष्ट्रीय अभ्यासक्रम आराखडा, २००५’ नुसार बदलली. ही पुस्तकेही प्रादेशिक भाषांमधून उपलब्ध करून देणे मंडळाला शक्य झालेले नाही. त्यामुळे गोष्टी विचारात घेऊन अन्य माध्यमांच्या सर्व विषयांच्या भाषांतराचे अधिकार मंडळाने जाहीरपणे खासगी प्रकाशन संस्थांना देण्याचे ठरविले आहे.
खासगी संस्थांनी पाठय़पुस्तके भाषांतरीत करताना मंडळाची मराठी व इंग्रजी माध्यमाची पुस्तके प्रमाणित मानावी. हे भाषांतर तपासून घेण्याची जबाबदारी मंडळावर नसेल. तसेच, भाषांतरीत मजकुराची जबाबदारी संबंधित प्रकाशन संस्थेवर असेल. कोणत्याही प्रकाशन संस्थेला भाषांतरासाठी शिफारस किंवा मान्यता दिली जाणार नाही, असे मंडळाकडून स्पष्ट करण्यात आले आहे.
अकरावी ऑनलाइन प्रवेशाची आज दुसरी यादी
अकरावीच्या ऑनलाइन प्रवेशाची दुसरी जागावाटप यादी रविवारी (३०जून) सायंकाळी ५ वाजता जाहीर करण्यात येणार आहे. पहिल्या यादीत तब्बल ४३ हजार ५४९ विद्यार्थ्यांना प्रथम पसंतीच्या महाविद्यालयात प्रवेश मिळाला होता.
