कोल्हापुरात व्यापाऱ्यांची मिरवणूक; गुन्हा दाखल

कोल्हापूर जिल्ह्यात पाच दिवसांचा अपवाद वगळता सुमारे तीन महिने दुकाने बंद होती

(संग्रहित छायाचित्र)

कोल्हापूर : जिल्हा प्रशासनाने दुकाने उघडण्यास परवानगी दिल्याने या उत्साहात बैलगाडीतून सवाद्य मिरवणूक काढणे व्यापाऱ्यांच्या अंगलट आले आहे. या प्रकरणी महाराष्ट्र चेंबर ऑफ कॉमर्सचे वरिष्ठ उपाध्यक्ष, राजारामपुरी व्यापारी असोसिएशनचे अध्यक्ष ललित गांधी यांच्यासह १३ व्यापाऱ्यांवर मंगळवारी राजारामपुरी पोलीस ठाण्यात गुन्हा दाखल झाला आहे.

कोल्हापूर जिल्ह्यात पाच दिवसांचा अपवाद वगळता सुमारे तीन महिने दुकाने बंद होती. जिल्हा प्रशासनाने सोमवारपासून दुकाने उघडण्यास परवानगी दिली होती. याचा आनंद साजरा करण्यासाठी राजारामपुरी येथे बैलगाडीतून सवाद्य मिरवणूक काढली. या बैलगाडीत गांधी हे व्यापारी, नागरिकांना अभिवादन करत होते. अन्य व्यापारी ‘करोना नियमावलीचे पालन करावे’ असे प्रबोधन फलक घेऊन चालत जात होते.

आज सामाजिक कार्यकर्ते बाबा इंदुलकर व अशोक देसाई यांनी जिल्हाधिकारी, पोलीस अधीक्षक व महापालिका आयुक्त यांच्याकडे तक्रार दाखल केली. रस्त्यावरील किरकोळ व्यापाऱ्यांनी नियम भंग केल्याने त्यांच्यावर कारवाई केली जाते. मात्र, धनदांडग्यांवर कारवाई का केली जात नाही, अशी विचारणा केली होती.

त्यानंतर सूत्रे हलली आणि करोना संसर्ग साखळी तोडण्यासाठी प्रतिबंधात्मक आदेशाचे उल्लंघन केल्यावरून गुन्हा दाखल केला. अशाप्रकारे प्रसिद्धीचा सोस गांधी यांच्यासह व्यापाऱ्यांना गुन्हा दाखल होण्यापर्यंत घेऊन गेला.

तर पुन्हा निर्बंध

कोल्हापूर जिल्हा करोना नियमावलीच्या तिसऱ्या टप्प्यात आहे. कोविड विषयक सर्व काळजी नागरिक, व्यापारी, उद्योजक, कामगार यांनी काळजी घ्यावी. परिस्थिती नियंत्रणात आल्याचे दिसले नाही तर पुन्हा जिल्ह्यात कडक टाळेबंदीचे नियम लागू करावे लागतील, असे जिल्हाधिकारी राहुल रेखावर यांनी मंगळवारी सांगितले.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व कोल्हापूर बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Fir against traders in kolhapur for violating covid 19 rule zws