ऊस परिषदेचे ऊसतोड रोखण्याचे आंदोलन

गत सालात गळीत झालेल्या उसाचे अंतिम बिल मिळण्यात यावे व गाळपास येणाऱ्या उसास दर ठरविण्यात यावा, तोपर्यंत साखर कारखान्यांनी ऊस तोडी देऊ नये, या आशयाचे निवेदन दत्त शिरोळ, गुरुदत्त टाकळीवाडी, जवाहर हुपरी, पंचगंगा इचलकरंजी या साखर कारखान्यांच्या व्यवस्थापनास दिले होते. मात्र शिरोळ तालुक्यात जवाहर, शरद आणि पंचगंगा या साखर कारखान्यांनी ऊसतोड कामगारांना ऊसतोडी दिल्या होत्या. शिरोळ तालुक्यात या कारखान्यांनी ऊसतोड दिली असल्याची माहिती सकल ऊस उत्पादक ऊस परिषदेच्या कार्यकर्त्यांना मिळाली. कार्यकर्त्यांनी शिरोळ, कुरूंदवाड, शेडशाळ, गौरवाड, कनवाड, शिरटी, दानोळी या भागात सुरू असलेल्या ऊसतोडी आज कार्यकर्त्यांनी रोखल्या.

सकल ऊस उत्पादक ऊस परिषदेच्या कार्यकर्त्यांनी अिहसक पद्धतीने आजचे आंदोलन केले. ऊसतोडी आहेत त्याठिकाणी जाऊन ऊसतोड मजुरांना व वाहन मालकांना हात जोडून विनंती करून सुरू असलेल्या ऊसतोडी बंद केल्या.

पत्रकारांशी बोलताना दादा काळे, बंटी देसाई, मुकुंद गावडे म्हणाले, गांधीगिरी पद्धतीने आम्ही या ऊसतोडी बंद केल्या आहेत. आम्हाला शेतकरी व वाहनमालकांचे नुकसान करायचे नाही. तरीही या दोन्ही साखर कारखान्यांनी पुन्हा ऊसतोडी सुरू केल्यास त्यांच्या विभागीय कार्यालयास टाळे टोकण्यात येईल, असेही त्यांनी सांगितले.