IND vs BAN: पापणी लवते ना लवते तोच…; रवींद्र जडेजाने पकडला अफलातून झेल, पव्हेलियनकडे पदकासाठी केला इशारा, पाहा Video

भारत आणि बांगलादेश सामन्यादरम्यान जडेजाने असा झेल घेतला की काही क्षणांसाठी मुशफिकुर रहीम देखील स्तब्ध झाला. सध्या संपूर्ण सोशल मीडियामध्ये त्याच्या झेलची चर्चा सुरु आहे. वास्तविक, जडेजा हा भारताचा सर्वोत्कृष्ट क्षेत्ररक्षक मानला जातो, याचा पुरावा जडेजाने बांगलादेशविरुद्धच्या सामन्यात पुन्हा एकदा दिला, जेव्हा त्याने जसप्रीत बुमराहच्या चेंडूवर पॉईंटला क्षेत्ररक्षण करत असताना हवेत सूर मारत मुशफिकुर रहीमचा झेल घेतला. हा असा झेल होता की फक्त गोलंदाजच नाही तर फलंदाजही अवाक् झाला.

शानदार झेल घेतल्यानंतर जडेजाने भारतीय डग आउटकडे पाहिले आणि पदकासाठी आवाहन केले. हा व्हिडिओ सोशल मीडियावर व्हायरल होत आहे. खरे तर सामन्यानंतर भारतीय व्यवस्थापन खेळाडूंना सर्वोत्तम क्षेत्ररक्षक म्हणून पदकेही देत ​​आहे. अशा स्थितीत जडेजाने अफलातून झेल घेतल्यानंतर जडेजाने ज्या प्रकारे सेलिब्रेशन केले ते त्याच गोष्टीचे संकेत देत होते. जडेजाने या सामन्यात अप्रतिम झेल घेतला, तर गोलंदाजीने आश्चर्यकारक कामगिरी करण्यातही तो यशस्वी ठरला. रवींद्र जडेजा १० षटकात ३८ धावा देऊन २ विकेट्स घेण्यात यशस्वी ठरला होता. नझमुल हुसेन शांतो आणि लिटन दास यांना बाद करण्यात जडेजाला यश आले आहे.

बांगलादेशने २५६ धावा केल्या

प्रथम फलंदाजी करताना बांगलादेशने आठ गडी गमावून २५६ धावा केल्या. वन डे वर्ल्ड कप २०२३ मध्ये सलग चौथा विजय मिळवण्यासाठी टीम इंडियासमोर २५७ धावांचे लक्ष्य आहे. बांगलादेशकडून लिटन दासने सर्वाधिक ६६ धावा केल्या. तर तनजीद हसनने ५१ धावांची खेळी केली. अखेरीस महमुदुल्लाहने ४६ धावांची खेळी करत संघाची धावसंख्या २५० धावांच्या जवळ नेली. मुशफिकुर रहीमने ३८ धावांचे योगदान दिले. भारताकडून जसप्रीत बुमराह, मोहम्मद सिराज आणि रवींद्र जडेजाने प्रत्येकी दोन विकेट्स घेतल्या. शार्दुल ठाकूर आणि कुलदीप यादव यांना प्रत्येकी गडी बाद करण्यात यश मिळाले.

हेही वाचा: IND vs BAN: विराट कोहलीने सहा वर्षांनंतर केली गोलंदाजी, स्टेडियममध्ये झाला एकच जल्लोष? पाहा Video

हार्दिक पांड्या जखमी

दुसरीकडे, हार्दिक पांड्याला सामन्यादरम्यान दुखापत झाली. त्यामुळे त्याला मैदान सोडावे लागले. बीसीसीआयने त्याच्याबद्दल अपडेट दिले आहे की त्याचे स्कॅनिंग केले जात आहे, अद्याप कोणतेही मोठे अपडेट आलेले नाही.