विजयात सातत्य राखण्यासाठी राजस्थान रॉयल्स उत्सुक

एकामागून एक विजय मिळवत राजस्थान रॉयल्सने गुणतालिकेत अव्वल स्थान पटकावले आहे. त्यामुळे विजयाची हॅट्ट्रिक साजरी केल्यानंतर सनरायझर्स हैदराबादबरोबर त्यांचा चौथा सामना होणार आहे. या वेळी विजयात सातत्य राखण्यावर त्यांचा भर असेल. दुसरीकडे हैदराबादच्या संघाने गेल्या सामन्यात विजय मिळवला होता, त्यामुळे या सामन्यात राजस्थानसारख्या बलाढय़ समजल्या जाणाऱ्या संघाला ते धक्का देण्यासाठी प्रयत्नशील असतील.
गेल्या सामन्यात बंगळुरूला पराभूत केल्यानंतर हैदराबादच्या संघाचा आत्मविश्वास दुणावला असेल. गेल्या सामन्यात कर्णधार डेव्हिड वॉर्नर आणि शिखर धवन यांनी दमदार सलामी दिली होती. त्यामुळे त्यांच्याकडून कामगिरीत सातत्य राखण्याची जबबादारी असेल. गोलंदाजांची चांगली फळी हैदराबादकडे आहे. डेल स्टेन आणि भुवनेश्वर कुमार यांच्याकडून संघाला मोठय़ा अपेक्षा नक्कीच असतील.
शेन वॉटसनच्या अनुपस्थितीमध्ये स्टीव्हन स्मिथ समर्थपणे संघाचे नेतृत्व करताना दिसत आहे, त्याचबरोबर फलंदाजीमध्येही तो दमदार कामगिरी करत आहे. अजिंक्य रहाणेसारखा खंदा फलंदाज त्यांच्याकडे असून तोदेखील लौकिकाला साजेशी कामगिरी करत आहे. संघामध्ये अष्टपैलू खेळाडूंचा भरणा असून ही संघाची जमेची बाजू आहे. धवल कुलकर्णी आणि प्रवीण तांबे हे दोन्ही मुंबईकर अचूक गोलंदाजी करत आहेत.