WPL 2025 GG vs UPW : गुजरात जायंट्सचा ऐतिहासिक विजय! यूपी वॉरियर्सविरुद्ध लक्ष्याचा पाठलाग करताना नोंदवला पहिला विजय

गुजरातच्या विजयात सर्वात मोठे आणि महत्त्वाचे योगदान कर्णधार अ‍ॅशले गार्डनरचे होते, जिने फलंदाजीत ५२ धावा केल्या आणि गोलंदाजीतही २ विकेट्स घेतल्या. यासह गुजरात जायंट्सने लक्ष्याचा पाठलाग करताना पहिल्यांदाच विजयावर शिक्कामोर्तब केला. या सामन्यात गुजरातने नाणेफेक जिंकून प्रथम गोलंदाजी करण्याचा निर्णय घेतला होता. कर्णधार अ‍ॅशले गार्डनरचा हा निर्णयही बरोबर ठरला.

गुजरातच्या घातक गोलंदाजीसमोर, यूपी वॉरियर्सने ७८ धावांपर्यंत ५ विकेट गमावल्या होत्या. यानंतर कर्णधार दीप्ती शर्मा आणि उमा छेत्री यांच्या २४ धावांच्या खेळीमुळे उत्तर प्रदेश संघाने कसा तरी १४३ धावांचा टप्पा गाठला. गुजरातकडून गोलंदाजी करताना प्रिया मिश्राने कहर केला आणि ३ बळी घेतले. यानंतर १४४ धावांच्या लक्ष्याचा पाठलाग करताना, गुजरात जायंट्सची सुरुवात खराब झाली. कारण बेथ मुनी आणि दयालन हेमलता यांनी २ धावांच्या आतच आपले विकेट गमावले.

मात्र, लॉरा वोल्वार्डने कर्णधार अ‍ॅशली गार्डनरला चांगली साथ दिली, पण वोल्वार्ड २२ धावा करून बाद झाली. गार्डनरने ५२ धावांची अर्धशतकी खेळी केली. त्यानंतर हरलीन देओल आणि डिआंड्रा डॉटिन यांनी शानदार फलंदाजी केली आणि शेवटपर्यंत नाबाद राहिल्या. दोघांमधील ५८ धावांच्या नाबाद भागीदारीमुळे गुजरातचा विजय निश्चित झाला. हरलीनने ३४ धावा केल्या आणि डॉटिनने १८ चेंडूत ३३ धावांची तुफानी खेळी केली. डॉटिनने तिच्या धमाकेदार खेळीत ३ चौकार आणि २ षटकार मारले. यासह गुजरातचा या हंगामातील पहिला विजय ठरला.