चंद्रपूर उपविभाग हेडरी अंतर्गत येणाऱ्या पोलीस मदत केंद्र हद्दीत नक्षलवादी आणि सी-६० कमांडोंच्या चकमकीत एक नक्षलवादी ठार झाला आहे. शुक्रवारी संध्याकाळी साडेपाच वाजल्याच्या सुमारास ही घटना घडली. गस्तीवर असलेल्या सी-६० जवानांच्या पथकावर नक्षलवाद्यांनी गोळीबार करण्यास सुरुवात केली. प्रत्युत्तरादाखल कमांडोंनीही नक्षलवाद्यांवर हल्ला चढवला. सुमारे अर्धा तास चाललेल्या या धुमश्चक्रीत एक नक्षलवादी ठार झाला आहे. सी-६० कमांडोंचा दबाव वाढत असल्याचं पाहून नक्षलवाद्यांनी घनदाट जंगलात पळ काढला. जंगल परिसराची पाहणी केली असता कमांडोंना एका नक्षल्याचा मृतदेह, १ हत्यार, २० पिट्टू आणि मोठ्या प्रमाणात नक्षल साहित्य सापडलं. चकमकीत ठार झालेल्या नक्षलवाद्याची ओळख पटवणं बाकी असून आजच्या घटनेनंतर सी-६० कमांडोंनी परिसरातली गस्त अधिक वाढवली आहे.
