महाबळेश्वर येथील एमटीडीसीच्या विलगीकरण कक्षामध्ये शनिवारी सायंकाळी एकाने आत्महत्या केल्याची, धक्कादायक घटना घडली. पंधरा दिवसांपूर्वी संबंधित व्यक्ती महाबळेश्वर तालुक्याच्या झांजवड गावातन आला होता. हा व्यक्ती मानसिक आजारी असल्याची माहिती समोर येत असून, त्याला दारुचे व्यसनही होते. याशिवाय तो सतत आत्महत्या करण्याची धमकी देखील देत होता, असेही स्थानिक व विलगीकरण कक्षातील त्याचा सहकाऱ्यांकडून सांगण्यात आले. ही व्यक्ती करोनाबाधित आहे की नाही हे अहवाल आल्यानंतर समजणार आहे. घटनास्थळी प्रांताधिकारी संगीता राजापूरकर-चौगुले, तहसीलदार सुषमा पाटील, पोलीस निरीक्षक बी ए कोंडुभैरी, आरोग्य अधिकारी अजय कदम यांनी भेट दिली. शवविच्छेदन करून मृतदेहावर अंत्यसंस्कार करण्यात येणार आहेत. घटनास्थळी आरोग्य विभागाचे कर्मचारी आणि पोलीस बंदोबस्त आहे. सदर व्यक्तीचे नाव प्रशासनाकडून कळवण्यात आलेले नाही.
