नांदेडमधील एका प्रसिद्ध निवृत्त न्यायाधिशांचे घर फोडून चोरट्यांनी ऐवज लंपास केला आहे. ते शहरालगतच्या स्वप्नजा गार्डन वाडी (बु.) येथे वास्तव्यास होते. यामध्ये चोरट्यांनी जवळपास तीन लाख रूपयांचा ऐवज लंपास केला आहे. याप्रकरणी भाग्यनगर पोलिसांनी बुधवारी रात्री उशिरा गुन्हा दाखल आहे. सेवानिवृत्त न्यायाधीश लक्ष्मण नागोराव देवकरे (६४) हे वाडी (बु.) परिसरात वास्तव्यास आहेत. मंगळवारी १८ डिसेंबर रोजी कुटुंबियांसोबत कपडे खरेदी करण्यासाठी गेले असताना ही चोरी झाली. घराला कुलूप लाऊन बाजारात गेल्याच्या संधीचा फायदा घेत अज्ञात चोरट्यांनी संध्याकाळी ५ वाजता घराचा कडीकोंडा तोडून घरात प्रवेश केला. चोरट्यांनी घरातील २ लाख ६८ हजार रूपयांचे सोन्याचे दागिने व २० हजार रूपये रोख असा २ लाख ८८ हजार रूपयांचा ऐवज लंपास केला. याप्रकरणी सेवानिवृत्त न्यायाधीश लक्ष्मण देवकरे यांच्या तक्रारीवरून भाग्यनगर पोलिसांनी गुन्हा दाखल केला आहे. या प्रकरणाचा अधिक तपास पोलीस करत आहेत.
