रत्नागिरी : दिव्यांगांसाठी मोठे आंदोलन छेडण्याचा इशारा प्रहार जनशक्ती पक्षाचे संस्थापक अध्यक्ष व माजी राज्यमंत्री बच्चू कडू यांनी राज्य सरकारला दिला आहे. दिव्यांग हक्क यात्रे’चा रत्नागिरी-सिंधुदुर्ग जिल्हा महासभेचा समारोप नुकताच रत्नागिरीतील वि. दा. सावरकर नाट्यगृहात झाला. यावेळी ते बोलत होते.माजी आमदार बच्चू कडू यांनी दिव्यांगांचे मानधन सहा हजार रुपये करण्याच्या मागणीसाठी तसेच शेतकरी आणि कोकणी बांधवांच्या न्याय्य हक्कांसाठी लढण्याचा निर्धार व्यक्त करत असल्याचे सांगितले.
प्रहार संघटनेची रत्नागिरी सिंधुदुर्ग जिल्ह्याच्या महासभा हक्क यात्रेचा समारोप रत्नागिरीत झाला. यावेळी ठाकरे शिवसेनेचे उपनेते बाळ माने, कुणबी समाजाचे नेते सुरेश भायजे, अशोक जाधव, ठाणे जिल्हाप्रमुख काजल नाईक, जिल्हाध्यक्ष आनंद त्रिपाठी, श्री. खाडे आदी मान्यवर उपस्थित होते.शिवाजी महाराजांच्या इतिहासातून ऊर्जा घेत, दिव्यांगांच्या हक्कांसाठी लढण्याचा निर्धार कडू यांनी व्यक्त केला. तसेच दिव्यांगांच्या मानधनात झालेली किरकोळ वाढही खऱ्या गरजूंसाठी मोलाची असल्याचे सांगून मानधन सहा हजार रुपये झाल्याशिवाय स्वस्थ बसणार नसल्याचे बच्चू कडू यांनी स्पष्ट केले.
मंदिरे, मशीद किंवा पुतळ्यांसाठी कोट्यवधींचा निधी देणारे लोकप्रतिनिधी स्वतःच्या निधीतून एखाद्या दिव्यांगाचे घर का उभे करत नाहीत? असा थेट सवाल कडू यांनी उपस्थित केला. एकदा सत्ता आल्यावर नेते सामान्य माणसाला विसरतात, यावर त्यांनी नाराजी व्यक्त केली.
ते म्हणाले, कोकणच्या विकासाच्या नावाखाली चाललेल्या शोषणावर बोट ठेवत, आंबा, काजू आणि मच्छीमार बांधवांचे कष्ट व्यापाऱ्यांच्या हाती लागल्यावर कसे वाया जातात, हे सांगितले. कोकणातील लोक गरीब राहिले तर शहरांतील कंपन्यांना स्वस्त मजूर मिळतात, हे ‘गरीब ठेवण्याचे जाणीवपूर्वक केलेले तंत्र’ असल्याचा गंभीर आरोप बच्चू कडू यांनी केला. मुंबई-गोवा-रत्नागिरी रस्त्याची दुर्दशा अनेक वर्षे कायम असून, खेड्यातील जीवन जाणीवपूर्वक वाईट केले जात असल्याचा दावाही बच्चू कडू यांनी केला. ते म्हणाले, “मनगटात जोर नसतो तेच लोक जात आणि धर्म घेऊन फिरतात, ज्याच्या मनगटात जोर असतो तो हक्काची लढाई लढतो.” सामान्य लोकांना मूळ प्रश्नांपासून दूर ठेवण्यासाठी जाती-धर्माच्या नावावर भांडणे लावली जातात. गरीब माणूस राजकारणातला ‘बोकड’ बनला आहे. दिव्यांग, शेतकरी आणि कोकणी बांधवांच्या न्याय्य मागण्यांसाठी तीन महिन्यांची मुदत देऊन, त्यानंतर सिंधुदुर्ग ते मुंबई असा पायी मोर्चा काढण्याचा आणि मुंबईत अधिवेशन घेण्याचा निर्धार त्यांनी यावेळी व्यक्त केला.
यावेळी मार्गदर्शन करताना माजी आमदार सुरेंद्र ऊर्फ बाळ माने यांनी संघर्ष आणि एकजुटीच्या गरजेवर भर दिला. त्यांनी बच्चू कडू यांचे गेली २५ वर्षे शेतकरी, कष्टकरी आणि दिव्यांग बांधवांसाठी असलेले तळमळीचे काम आणि संघर्षशील प्रवास याची प्रशंसा केली. माने यांनी रत्नागिरीचे पालकमंत्री उदय सामंत यांच्यावर सडकून टीका करत, “पालक कसा असतो? तो कुटुंबाचं संरक्षण करतो, कुटुंबाचा प्रमुख असतो. पण हे कुठचे पालक आहेत मला माहिती नाही.” राज्य सरकारच्या मुख्यमंत्र्यांनी आणि पालकमंत्र्यांनी गेल्या तीन ते पाच वर्षांत दिव्यांग जणांना त्यांच्या हक्काचा नियमानुसार असलेला जिल्हा नियोजन मंडळाचा निधीदेखील दिला नाही, असा आरोप माने यांनी केला. असे लोक पालकमंत्री राहण्यास पात्र नाहीत,” असे ही मत व्यक्त केले.
