सातारा : वाई विभागाचे पोलीस उपअधीक्षक बाळासाहेब भालचिम यांना आपल्या प्रदीर्घ सेवेमध्ये केलेल्या गुणवत्तापूर्ण कामाबद्दल राष्ट्रपती पदक जाहीर झाले आहे.
बाळासाहेब भालचिम हे मागील सव्वादोन वर्षांपासून वाई येथे उपअधीक्षक म्हणून काम पाहत आहेत. यापूर्वी त्यांनी नागपूर शहर, नांदेड, सोलापूर, मुंबई, कोल्हापूर शहर व सातारा जिल्ह्यात आपल्या प्रदीर्घ सेवेत गुणवत्तापूर्ण उत्कृष्ट कामकाज केले आहे.
त्यांनी तपास केलेले गुन्हे आणि दाखल केलेले दोषारोप पत्र न्यायालयात सिद्ध होऊन अनेक गुन्हेगारांना शिक्षा झालेली आहे. त्यांच्या कामाची पद्धत नेहमी वेगळी राहिली आहे. सहकाऱ्यांना मार्गदर्शन करून बरोबर घेऊन जाण्याची त्यांची कामाची शैली आहे. तपास कामातही त्यांचा हातखंडा आहे. या पूर्वी त्यांना केंद्रीय गृह मंत्रालयाचे पोलीस पदक, पोलीस महासंचालकांचे पदक आणि आता राष्ट्रपती पदक मिळाले आहे. राष्ट्रपती पदक मिळाल्याबद्दल त्यांचे सर्व स्तरातून अभिनंदन होत आहे.
