सोलापूर : अक्कलकोट शहरात नव्याने उभारण्यात येणाऱ्या एसटी बस स्थानक परिसरात दक्षिणेच्या बाजूने रस्ता मोकळा सोडण्याच्या मागणीसाठी अलिकडेच काही कार्यकर्त्यांनी उपोषण केले होते. त्यास प्रत्युत्तर म्हणून हिंदुत्ववादी संघटनांनी हिंदू जनआक्रोश मोर्चा काढून शक्तिप्रदर्शन घडविले.
अक्कलकोटचे भाजपाचे आमदार सचिन कल्याणशेट्टी यांच्यासह आमदार गोपीचंद पडळकर, आमदार संग्राम जगताप आणि आमदार देवेंद्र कोठे यांच्या नेतृत्वाखाली काढण्यात आलेल्या या हिंदू जन आक्रोश मोर्चा हजारोंचा जनसमुदाय लोटला होता. यानिमित्ताने अक्कलकोटमध्ये सामाजिक वातावरण तापले असून सार्वजनिक शांतता व सुव्यवस्थेवर प्रश्नचिन्ह उपस्थित होत आहे.
अक्कलकोट तीर्थक्षेत्र विकास योजनेअंतर्गत विविध विकासकामे होत आहेत. यात जुने एसटी बस स्थानक पाडून सुमारे २९ कोटी रुपये खर्चाचे नवीन अद्ययावत बस स्थानक उभारले जात आहे. बसस्थानकाच्या भोवताली संरक्षण भिती उभारल्या जात असताना त्यात दक्षिणेकडे असलेल्या रस्त्याची पूर्वीपासून असलेली वहिवाट बंद न करता कायम ठेवावी, अशी मागणी आहे. तथापि, आमदार सचिन कल्याणशेट्टी यांचा दक्षिणेकडील बाजूने रस्ता मोकळा सोडायला तीव्र विरोध आहे. एसटी बस स्थानकाची उभारणी श्री स्वामी समर्थ महाराजांच्या लाखो भाविकांच्या सोयीसाठी करण्यात येत असून कोणाला अतिक्रमणे थाटण्यासाठी नाही, अशी भूमिका घेत आमदार कल्याण शेट्टी यांनी आक्रमक पवित्रा घेतला आहे. यातून त्यांचे राजकीय प्रतिस्पर्धी तथा अलिकडेच काँग्रेसचा राजीनामा देऊन शिवसेना एकनाथ शिंदे पक्षात प्रवेश केलेले माजी मंत्री सिद्धाराम म्हेत्रे यांना शह देण्याचा डाव आखला गेल्याचे मानले जाते.
आमदार कल्याणशेट्टी म्हणाले, की खरेतर एसटी बसस्थानक उभारणीचा विषय धार्मिक असू शकत नाही असे नाही नाही. परंतु यात जाणीवपूर्वक आसपास अतिक्रमणे करून अडथळा आणला जात आहे. यातून श्री स्वामी समर्थ महाराजांच्या भाविकांची गैरसोय होऊ शकते. म्हणून हिंदू जन आक्रोश मोर्चा काढावा लागत आहे. यापूर्वीही तालुक्यात हिंदू जन आक्रोश मोर्चे काढण्यात आले होते. आता भविष्यात आणि मोठ्या प्रमाणावर हिंदू जन आक्रोश मोर्च काढले जातील, असा इशारा त्यांनी दिला.
या सभेत आमदार गोपीचंद पडळकर, आमदार देवेंद्र कोठे, आमदार संग्राम जगताप यांच्यासह वीरशैव मठाचे मठाधिपती श्री बसवलिंग महास्वामीजी व नीलकंठ महास्वामीजींची आक्रमक शैलीत भाषणे झाली.
