नांदेड: धर्मापुरी तांडा येथे ९ लाखांचा १८ क्विंटल गांजा जप्त; दोन आरोपी गजाआड, कंधार तालुक्यात पोलिसांची कारवाई

ही कार्यवाही स्थानिक गुन्हे शाखाचे सहायक पोलीस निरीक्षक रविकुमार वाहुळे व पथकाने केली. एवढ्या मोठ्या प्रमाणात अंमली पदार्थ सापडण्याची ही पहिलीच वेळ होय. याप्रकरणी माधव विठ्ठल जाधव (वय ३९, व्यवसाय शेती, रा. धर्मापुरी तांडा, ता. कंधार) आणि अशोक मरीबा वाघमारे (वय ३०, व्यवसाय चालक, रा. भोसी रोड, कंधार) या दोघांना अटक करण्यात आली आहे. हे दोघेही स्वतःच्या आर्थिक फायद्यासाठी लोकांना गांजाची विक्री करण्याच्या उद्देशाने त्याची वाहतूक करत असताना रंगेहात पकडले गेले.

पोलीस सूत्रांनी दिलेल्या माहितीनुसार १३ जून २०२५ रोजी दुपारी २.३७ वाजता धर्मापुरी फाटा ते नयधरवाडीकडे जाणाऱ्या कच्च्या शिवरस्त्यावर ही कारवाई करण्यात आली. या गुन्ह्यात वापरण्यात आलेल्या वाहनाचा मालक माधव गोरे (रा. सुजलेगाव, ता. नायगाव) हा सध्या फरार असून पोलीस त्याचा शोध घेत आहेत. या प्रकरणाचा पुढील तपास सहाय्यक पोलीस निरीक्षक केदार यांच्याकडे सोपवण्यात आला आहे.