Maharashtra Assembly Budget Session 2025 LIVE: अविश्वास ठराव तरी नीलम गोऱ्हे सभापतींच्या खुर्चीवर कशा? ठाकरे गटाचा सवाल

मुख्यमंत्री देवेंद्र फडणवीस यांनी सरकारमधील सहकाऱ्यांना घेऊन छावा चित्रपट पाहिला. पण राज्यपालांच्या अभिभाषणात छत्रपती संभाजी महाराज यांचा उल्लेख आढळला नाही. तसेच तुम्ही छावा बघता, तर मला पण बघा, असे विधान शिवसेनेचे (ठाकरे) नेते अनिल परब यांनी केले. विधानपरिषदेत बोलताना ते म्हणाले, "धर्म बदलण्यासाठी छत्रपती संभाजी महाराजांचा छळ झाला. माझ्यावर पक्ष बदलण्यासाठी छळ झाला. मी सगळे भोगले, पण पक्ष बदलला नाही. बाकी सर्वांना जरा हूल दिली की, लगेच गेले पक्ष सोडून."

जलसंपदा विभाग ग्रामीण भागासाठी अतिशय महत्त्वाचा असा विभाग आहे. या विभागातील अधिकारी मोहित कंबोज यांच्या इशाऱ्यावर काम करत आहे, असा आरोप विधानपरिषदेचे विरोधी पक्षनेते अंबादास दानवे यांनी केला. जलसंपदा विभागाचे अधिकारी मोहित कंबोजने सांगितल्याशिवाय पाणीही पित नाहीत. कंबोजशिवाय या खात्यात पानही हलत नाही. ग्रामीण भागाचे निर्णय घेणारा मोहित कंबोज कोण आहे? असे प्रश्न अंबादास दानवे यांनी उपस्थित केले.

“मुंबईत येणाऱ्यांनी मराठी शिकलं पाहिजे असं काही नाही. इथे वेगवेगळ्या भाषा बोलल्या जातात. जसे की मुंबईतील घाटकोपर परिसराची भाषा गुजराती आहे”, असे वादग्रस्त वक्तव्य राष्ट्रीय स्वयंसेवक संघाचे वरिष्ठ नेते भैय्याजी जोशी यांनी मुंबईतील एका कार्यक्रमात केले होते. यावर विधानसभेत गदारोळ झाला. यावर मुख्यमंत्री देवेंद्र फडणवीस यांनी सरकारतर्फे उत्तर दिले आहे. मुंबई आणि महाराष्ट्राची अधिकृत भाषा मराठीच आहे, असे ते म्हणाले. आम्ही प्रत्येक भाषेचा सन्मान करतो. पण मराठीला डावलता कामा नये, असेही ते म्हणाले.