Maharashtra Breaking News Live: सरन्यायाधीश बी. आर. गवई यांच्यावरील हल्ल्याच्या निषेधार्थ शरद पवार गटाचे आंदोलन

सरन्यायाधीश बी. आर. गवई यांच्यावरील हल्याप्रकरणी काँग्रेसच्या माजी मंत्री यशोमती ठाकूर यांनी निषेध व्यक्त केला आहे. त्या म्हणाल्या, "सर्वोच्च न्यायालयात अत्यंत निंदनीय प्रकार घडला आहे. सरन्यायाधीश बी. आर. गवई यांच्यावर एका मनुवादी विचारांच्या वकीलाने बूट भिरकावल्याची घटना घडली असून हा प्रकार भारतीय लोकशाहीसाठी गंभीर इशारा आहे. वर्णवर्चस्ववादी आणि मनुवादी विचारसरणीच्या प्रवाहातून उद्भवलेली ही घटना न्यायव्यवस्था, संविधान आणि लोकशाही मूल्यांवर थेट हल्ला आहे. अशा उजव्या विचारसरणीच्या आणि मनुवादी प्रवृत्तीच्या विरोधात काँग्रेस पक्ष सतत आणि निकराने लढा देत राहील. संविधानाचे रक्षण, लोकशाहीचे जतन आणि सर्वसामान्य जनतेच्या अधिकारांचे संरक्षण करण्यासाठी काँग्रेस कोणत्याही परिस्थितीत मागे हटणार नाही."

सर्वोच्च न्यायालयात काल सरन्यायाधीश बी. आर. गवई यांच्यावर एका वकिलाने बूट फेकल्याचा प्रकार घडला आहे. याच्याविरोधात राष्ट्रवादीच्या (शरद पवार) खासदार सुप्रिया सुळे आणि युगेंद्र पवार बारामतीमध्ये मूक आंदोलनास बसले आहेत.