‘गरज पडल्यास मैत्रीपूर्ण लढत’; साताऱ्यात स्थानिक निवडणुकीसाठी भाजप, महायुतीचे लवचिक सूत्र….

सातारा जिल्हाध्यक्ष आमदार अतुल भोसले यांच्या अध्यक्षतेखाली ही तातडीची बैठक घेण्यात आली. या बैठकीला सार्वजनिक बांधकाम मंत्री शिवेंद्रसिंहराजे भोसले, खासदार उदयनराजे भोसले, राज्याचे ग्रामविकास मंत्री जयकुमार गोरे तसेच जिल्हा कार्यकारिणीचे पदाधिकारी यावेळी उपस्थित होते.

भारतीय जनता पार्टीने स्थानिक स्वराज्य संस्था निवडणुकांमध्ये भाजपचे जास्तीत जास्त उमेदवार निवडून आणण्याच्या दृष्टीने रणनीती सुरू केली आहे. या रणनीतीचा भाग म्हणून सुमारे दोन तास शासकीय विश्रामगृहाच्या दालनात बैठक झाली. स्थानिक स्वराज्य संस्थांच्या निवडणुकीमध्ये नव्या चेहऱ्यांना संधी देण्याचे सुतोवाच खासदार उदयनराजे भोसले यांनी केले.

तर उमेदवार निवडला जाताना तो निवडून येण्याच्या क्षमतेचा असावा तसेच त्याला राजकीय समन्वयक ज्ञान आणि सर्वसामान्य लोकांचे प्रश्न हाताळण्याची हातोटी अशा विविध गुणांची गरज आहे, अशी मांडणी जिल्हाध्यक्ष अतुल भोसले यांनी केली.

शिवेंद्रसिंहराजे भोसले यांनी सुद्धा या समन्वयक चर्चेमध्ये भाग घेतला आणि आपले विचार मांडत मैत्रीपूर्ण लढती आणि महायुती अशा दोन्ही गोष्टींवर जोर दिला. सातारा जिल्ह्यामध्ये महायुतीच्या तिन्ही घटक पक्षांची राजकीय बलाबल लक्षात घेता आणि जास्तीत जास्त चेहऱ्यांना संधी देणे त्यासाठी राजकीय समीकरणे तपासणी या दृष्टीने रचना करावी लागणार आहे, अशी मांडणी बैठकीमध्ये करण्यात आली. त्यानुसार आगामी बैठकीमध्ये बूथ प्रमुख, मंडल प्रमुख, केंद्र प्रमुख यांच्याकडून मतदार याद्या मागवून घेऊन त्या दृष्टीने समन्वयक चर्चा केली जाणार असल्याचे अतुल भोसले यांनी सांगितले.

हास्यविनोदात रंगले प्रतिनिधी

खासदार उदयनराजे भोसले आणि ग्राम विकास मंत्री जयकुमार गोरे हे शासकीय विश्रामगृहाच्या व्हरांड्यात हास्य विनोदांमध्ये रमलेले दिसून आले. ग्रामविकास मंत्री जयकुमार गोरे यांचा नुकताच वाढदिवस झाला आहे. यानिमित्त त्यांनी जयकुमार गोरे यांना वाढदिवसाचा जल्लोष कधी, असे म्हणत पार्टी मागितली. याला जयकुमार गोरे यांनी हसून प्रतिसाद दिला. यावेळी झालेल्या हास्यविनोदात लोकसभा समन्वयक सुनील काटकर व अन्य भाजप पदाधिकारी हास्यकल्लोळात बुडून गेले.