पुनर्वसनाची कामे तातडीने पूर्ण करा : शंभूराज देसाई

पाटण तालुक्यातील दरड व भूस्खलनग्रस्त ४७४ कुटुंबांची १५१ तात्पुरत्या निवारा शेडमध्ये सोय करून देण्यात आली आहे.

shambhuraj desai announces sangli tourism initiatives

सांगली जिल्ह्यात पर्यटनाला चालना देणार, पर्यटनमंत्री शंभूराज देसाईंचे आश्वासन (संग्रहित छायाचित्र)

कराड : पाटण तालुक्यातील दरड व भूस्खलनग्रस्त ४७४ कुटुंबांची १५१ तात्पुरत्या निवारा शेडमध्ये सोय करून देण्यात आली आहे. त्यांच्या पुनर्वसनासाठी शासनाने मंजूर केलेल्या घरकुलांची कामे तातडीने पूर्ण करा, असे निर्देश सातारचे पालकमंत्री शंभूराज देसाई यांनी दिले.

पाटणमध्ये विविध विकासकामांचा आढावा पालकमंत्री देसाई यांनी घेतला. जिल्हाधिकारी संतोष पाटील, पोलीस अधीक्षक तुषार दोशी, महाराष्ट्र पर्यटन विकास महामंडळाचे महाव्यवस्थापक नीलेश गहने, सार्वजनिक बांधकाम विभागाचे अधीक्षक अभियंता संतोष रोकडे, अतिरिक्त मुख्य कार्यकारी अधिकारी विश्वास सिद्द, कार्यकारी अभियंता राहुल अहिरे यांच्यासह अधिकारी वर्गाची या वेळी उपस्थिती होती.

देसाई म्हणाले, पाटण तालुक्यातील दरड व भूस्खलनग्रस्त कुटुंबांना कायमस्वरूपी पुनर्वसनासाठी घरकुले मंजूर आहेत. यासाठी निधीही मंजूर करण्यात आलेला आहे. धावडे येथे ७९, काहीर ३७, आंबेघर ३०, गोकुळ तर्फ ८, चाफेर १०२ येथे काम सुरू आहे. ही सर्व कामे गतीने पूर्ण करावीत. देशमुखवाडी येथील १९२ घरकुलांचे काम पावसाळ्यानंतर त्वरित सुरू करावे. त्याबरोबरच मोडकवाडीतील ८८ घरकुलांच्या जागेसाठी पाहणी तातडीने करावी, असे निर्देशही त्यांनी दिले.

हेही वाचा

मुख्यमंत्री फडणवीसांचे स्थानिक स्वराज्य संस्थांच्या निवडणुकीबाबत महत्त्वाचे विधान; म्हणाले, “महाराष्ट्राच्या मनात…”

पापर्डे व येराड येथील जल पर्यटन केंद्राचा आढावा घेताना पालकमंत्री देसाई म्हणाले, कामांची निविदा काढावी या कामांसाठी निधी उपलब्ध झाला आहे. या कामांमध्ये काही अडचणी असतील तर त्या तातडीने दूर कराव्यात, अशा सूचना पालकमंत्र्यांनी दिल्या.

कराड ते चिपळूण रस्त्यांचा आढावा घेताना, देसाई म्हणाले, म्हावशी फाटा ते संगमनगर धक्का मार्गाचे काम पूर्ण करण्यासाठी संबंधित अधिकारी व ठेकेदाराने निर्धारित वेळेत, पूर्ण लक्ष केंद्रित (मिशन मोडवर) करावे. कुठे अतिक्रमणे असतील तर ती तातडीने काढावीत, अशा सूचना देसाई यांनी दिल्या. वाटोळे येथील राज्य उत्पादन शुल्क विभागाच्या प्रशिक्षण केंद्राच्या कामाचाही आढावाही त्यांनी घेतला.