आघाव यांच्यावर लवकरच निलंबनाची कारवाई

नेवासे येथील विधिज्ञ रियाज पठाण यांचा पोलीस ठाण्यासमोर गोळय़ा झाडून खून करण्यात आल्याच्या घटनेची गंभीर दखल घेण्यात आली असून, कायदा व सुव्यवस्था राखण्यात अपयश आल्याने पोलीस निरीक्षक मुकुंद आघाव यांच्यावर निलंबनाची कारवाई केली जाणार आहे.
पोलीस ठाण्यासमोर गुन्हेगार गोळीबार करतात, पोलिसांना घाबरत नाहीत, गुन्हेगारांचे मनोधैर्य वाढले असून, गुन्हेगारी टोळय़ांतील सूडचक्र थांबविण्यात पोलिसांना अपयश आले. हे खुनाच्या घटनेमुळे स्पष्ट झाले. त्यामुळे निरीक्षक आघाव यांच्याकडून पोलीस ठाण्याचा कार्यभार काढून घेण्यात आला. प्रभारी कार्यभार निरीक्षक कैलास फुंडकर यांच्याकडे देण्यात आला होता. गुन्ह्याचा तपास सहायक पोलीस निरीक्षक संदीप चकोर यांच्याकडे सोपविण्यात आला असून, आता तपास गुन्हे शाखेचे अधिकारी चोभे यांच्याकडे दिला जाण्याची शक्यता आहे.
निरीक्षक आघाव यांची पोलीस उपअधीक्षक गणेश राठोड हे खातेनिहाय चौकशी करीत आहेत. गुन्हेगारांवर कायम प्रतिबंधात्मक कारवाई करणे, अधिका-यांचे काम असते. तसेच त्यांच्यावर नोटिसा बजावल्या जातात. वरिष्ठ अधिका-यांनी वारंवार आदेश देऊनही हे काम आघाव यांनी केले नव्हते. त्यामुळे गुन्हेगारांचे मनोधैर्य वाढले, असा प्राथमिक निष्कर्ष निघाल्यानंतर त्यांची चौकशी करण्याचा निर्णय अधीक्षक रावसाहेब िशदे यांनी घेतला. येत्या दोन-तीन दिवसांत हा चौकशी अहवाल दिला जाणार असून, त्यानंतर आघाव यांच्यावरील निलंबनाचा प्रस्ताव तयार केला जाणार आहे. गोळीबार प्रकरणात आघाव हे निलंबित होण्याची शक्यता आहे.
गावठी पिस्तूल पकडले
नेवासे शहरात गुन्हे शाखेच्या पथकाने छापा टाकून अंकुश राजेंद्र पंडुरे (वय १९) व अविनाश खंडागळे (वय १९, रा. भानसहिवरा) या दोघा तरुणांकडून गावठी पिस्तूल व तीन काडतुसे जप्त करण्यात आली. दोघांविरुद्ध नेवासे पोलीस ठाण्यात गुन्हा नोंदविण्यात आला आहे. नेवाशात मोठय़ा प्रमाणात गावठी पिस्तुले गुन्हेगारांकडे असून, दोघांच्या अटकेमुळे त्याचा शोध घेणे शक्य होणार आहे.