अभिनेता आयुषमान खुरानाचा ‘अंधाधून’ हा चित्रपट प्रेक्षकांना फार आवडला. समीक्षकांनीही चित्रपटाची आणि त्यातील आयुषमानच्या अभिनयाची स्तुती केली. आता भारताची गानकोकीळा अर्थात लता मंगेशकर यांनी ट्विटरच्या माध्यमातून आयुषमानवर कौतुकाचा वर्षाव केला आहे. त्यांनी नुकताच हा चित्रपट बघितला आहे.

आयुषमानच्या अभिनयाचं कौतुक करत लतादीदींनी लिहिलं, “आयुषमानजी नमस्कार. मी तुमचा अंधाधून हा चित्रपट आज पाहिला. तुम्ही खूप चांगलं काम केलंय आणि जी गाणी तुम्ही गायली आहेत, तीसुद्धा मला फार आवडली. माझ्याकडून तुम्हाला फार शुभेच्छा आणि भविष्यातही तुम्हाला यश मिळो अशी प्रार्थना करते.” लतादीदींचे आभार मानत आयुषमानने ट्विटरवर लिहिलं, “तुमचे हे शब्द माझ्यासाठी खूप महत्त्वाचे आहेत. तुमच्याकडून मिळणाऱ्या या प्रोत्साहनपर शब्दांसाठीच कदाचित मी मेहनत घेतली होती. आशिर्वादासाठी धन्यवाद.”

एकमेकांत अडकलेल्या चित्रविचित्र प्रश्नांची मालिका श्रीराम राघवन दिग्दर्शित ‘अंधाधून’ या चित्रपटाने प्रेक्षकांसमोर मांडली होती. एकापाठोपाठ एक शब्दश: अंदाधुंद कारभार वाटावा अशा घटना या चित्रपटात घडतात आणि त्याचा शेवट मात्र प्रेक्षकाला कोड्यात टाकतो.