बॉलीवूडचे प्रसिद्ध गायक उदित नारायण यांचा मुलगा आदित्य नारायणही लोकप्रिय गायक आहे. आपल्या आवाजाच्या जोरावर आदित्यने गायनाच्या क्षेत्रात आपले वेगळी ओळख निर्माण केली आहे. सोशल मीडियावर आदित्य मोठ्या प्रमाणात सक्रिय असतो. निरनिराळे फोटो व व्हिडीओ शेअर करीत तो चाहत्यांना अपडेट देत असतो. आपल्या आवाजाबरोबरच आदित्य त्याच्या रागीट स्वभावामुळेही नेहमी चर्चेत असतो. दरम्यान, आदित्यचा एक व्हिडीओ सध्या सोशल मीडियावर मोठ्या प्रमाणात व्हायरल होत आहे.
व्हायरल होत असलेला व्हिडीओ एक कॉन्सर्टमधला आहे. छत्तीसगडच्या भिलाईमधील एका महाविद्यालयात कार्यक्रमाचे आयोजन करण्यात आले होते. या कार्यक्रमात आदित्य नारायणचा लाइव्ह कॉन्सर्ट शो ठेवण्यात आला होता. या कॉन्सर्टला हजारो युवक-युवतींनी हजेरी लावली होती. या कार्यक्रमात आदित्य एका चाहत्यावर खूपच भडकलेला दिसला. रागाच्या भरात त्याने चाहत्याचा मोबाईल हिसकावून लांब फेकून दिला असल्याचे बघायला मिळाले.
लाइव्ह कॉन्सर्टमध्ये आदित्य डॉन चित्रपटातील आज की रात गाणे गात होता. यावेळी अनेक प्रेक्षक आपल्या मोबाईलमधून त्याचा व्हिडीओ बनवत होते. कदाचित आदित्यला ही गोष्ट आवडली नाही. त्याने प्रेक्षकांमधील एका युवकाच्या हातातवर माईकने जोरजोरात फटका मारला व त्याचा मोबाईल हिसकावून घेतला व त्यानंतर त्याने तो मोबाईल लांब फेकून दिला. सोशल मीडियावर आदित्यचा हा व्हिडीओ मोठ्या प्रमाणात व्हायरल झाला आहे. अनेक नेटकऱ्यांनी या व्हिडीओ कमेंट करत त्याला ट्रोल केले आहे.
व्हिडिओवर कमेंट करत एका यूजरने लिहिले- ‘आदित्य नारायणला काय प्रॉब्लेम आहे? त्याला कशाचा इतका गर्व आहे? स्वतःच्या चाहत्यांचा अनादर.’ दुसऱ्याने लिहिले- ‘त्याची ही वृत्ती संतापजनक आहे. त्या व्यक्तीच्या हातावर माईक मारला.” मात्र, आदित्यची राग अनावर होण्याची ही पहिलीच घटना नाही. या अगोदरही अनेकदा तो आपल्या रागीट स्वभावामुळे चर्चेत आला आहे.
