“माझ्याकडे काम नव्हतं, मी दारूच्या अहारी गेलेलो…”; ‘बॅड्स ऑफ बॉलीवूड’ फेम बॉबी देओलचा खुलासा, म्हणाला…

बॉबी देओलने राज शमानीला दिलेल्या मुलाखतीत याबद्दल सांगितलं आहे. तो म्हणाला, “मी माझ्या कुटुंबासाठी काम करत आहे, पण त्यांच्या डोळ्यात मला माझ्याबद्दलची भीती दिसायची. असं नाहीये की मी दररोज दारू प्यायचो, पण जेव्हा मी दारू प्यायलेलो असायचो तेव्हा ते मला खूप घाबरायचे. दारू ड्रग्जपेक्षाही अधिक भयानक आहे आणि ती तुमच्या मेंदूला विचलित करते.”

अभिनेता पुढे म्हणाला, “मी खूप कठीण काळातून जात होतो. माझा भाऊ, वडील सगळेच पूर्वी करायचे तितकं काम करत नव्हते. घरी थोडी चिंताजनक परिस्थिती निर्माण झालेली, पण माझ्या भावाने मला कधीच ती जबाबदारी घेऊ दिली नाही, त्याने मला या ताणतणावापासून दूर ठेवलं.”

मुलाच्या ‘त्या’ वाक्यामुळे दुखावलेला बॉबी देओल

बॉबी देओलने पुढे सांगितलं की, तो दारूमुळे त्याच्या आरोग्यावर काय परिणाम होईल याचा विचार करायचा नाही. तो म्हणाला, “मी कित्येकदा कसा दिसतोय हेसुद्धा आरशात पाहायचो नाही. त्यामुळे मला प्रश्न पडतो की माझ्या अभिनयापेक्षाही माझ्या दिसण्याला अधिक महत्त्व कसं देण्यात आलं. एकदा तर मी घरी बसलेलो असताना माझा मुलगा माझ्या बायकोला म्हणाला, तू रोज कामावर जातेस आणि बाबा मात्र घरीच बसलेला असतो. त्याच्या त्या वाक्यामुळे मला खूप त्रास झाला. मी विचार केला की, मी कसा वडील आहे आणि त्यामुळे बऱ्याच गोष्टी बदलल्या.”

बॉबी देओलने सांगितलं की, तो कठीण प्रसंगातून जात असताना तो त्यासाठी इतरांना जबाबदार ठरवायचा. याबद्दल तो म्हणाला, “तुम्हाला असं वाटू लागतं की तुम्ही काही कामाचे नाही आहात आणि मी खूप भावुक असल्याने यामुळे माझ्यावर खूप परिणाम झाला. तेव्हा मी दारूचा आधार घ्यायचो, त्यामुळे मी माझ्या आरोग्यावर याचा काय परिणाम होईल हा विचार न करता खूप दारू प्यायला लागलो. मी दारूच्या आहारी गेलो होतो. मी इतरांना दोष द्यायला लागलो. मला इतर कलाकारांचा हेवा वाटायचा. पण, ते यशस्वी का होत आहेत याचा विचार करायचो नाही. ते खूप मेहनत करत होते म्हणून त्यांना यश मिळत होतं. सलमान खान, शाहरुख खान, आमिर खान, अक्षय कुमार आज जे काही आहेत, ते त्यांच्या मेहनतीमुळे.”

बॉबी देओल पुढे म्हणाला की, “फक्त माझ्या जवळच्या माणसांनाच माझी ही बाजू माहीत आहे. दारूच्या नशेत असताना तुम्ही रागवता, चिडता, काहीही बोलता त्यावेळी तुम्हाला शुद्ध नसते. लोक म्हणतात की, दारू प्यायलेला माणूस खरं बोलतो. पण ते तसं नसतं, दारू प्यायलेला माणूस खरं नाही बोलत; तो ते बोलतो ज्याबद्दल त्याच्या मनात राग असतो. पण, यामुळे तुमच्या जवळच्या माणसांना त्रास होतो आणि याच कारणामुळे मी दारू पिणं सोडलं. आता एक वर्षाहून अधिक काळ झाला असेल मी दारू पिणं सोडलं आहे.”

दरम्यान, बॉबी देओलने ‘रेस ३’ चित्रपटातील भूमिकेतून कमबॅक केलं. त्यानंतर तो ‘एम एक्स प्लेअर’वरील ‘आश्रम’ या सीरिजमुळे बराच चर्चेत होता. यानंतर तो रणबीर कपूरच्या ‘अ‍ॅनिमल’ चित्रपटात झळकला. आता अभिनेता आर्यन खानच्या ‘बॅड्स ऑफ बॉलीवूड’ या सीरिजमधून झळकत आहे.