बॉलिवूडमधील नेपोटीजमबद्दल बरीच चर्चा सोशल मीडियावर होत असते. सतत या स्टारकिड्सवर टीका होताना आपण पाहतो. काही महिन्यांपूर्वी शाहरुख खानचा मुलगा आर्यन खानच्या अटकेचं प्रकरण चांगलंच गाजलं होतं. ड्रग्स प्रकरणात अडकल्याने त्याच्यावर चांगलीच टीका झाली होती. शाहरुख खानवरही वैयक्तिक टीका होत होती. आर्यन खानला या प्रकरणार क्लीन चीटही मिळाली पण अजूनही त्याच्याबद्दल चर्चा ही सुरूच आहे.
आर्यन खान बॉलिवूडमध्ये पदार्पण करणार याची चर्चा बरीच वर्षं सुरू आहे. इतर स्टारकिड्सप्रमाणे शाहरुख आर्यनलाही मोठ्या चित्रपटातून पुढे आणणार असल्याच्या चर्चा आपण ऐकल्या असतील. शाहरुखची मुलगी सुहाना ही झोया अख्तरच्या वेबसीरिजमधून पदार्पण करणार आहे, पण अजूनही आर्यन खानच्या बॉलिवूड डेब्यूबद्दल कुठेच काही चर्चा नाही. पण आर्यन आता लेखक म्हणून बॉलिवूडमध्ये पदार्पण करणार असल्याची चर्चा रंगताना दिसत आहे.
आणखी वाचा : ‘कॉफी विथ करण’मधील शाहरुखच्या अनुपस्थितीविषयी करण जोहरने सोडलं मौन; म्हणाला “तो या कार्यक्रमाचा…”
‘पिंकव्हीला’च्या माहितीनुसार रेड चिलीजच्या एका प्रोजेक्टमध्ये आर्यन लेखक म्हणून काम करणार आहे. त्यासाठी तो सगळं प्रशिक्षणही घेत आहे. बरीच दिग्गज मंडळी आर्यनला याचं प्रशिक्षण देत असल्याची चर्चा सध्या होत आहे. इतकंच नाही तर शाहरुख खानने इस्राइली दिग्दर्शन लिओर राज या दिग्दर्शकालाही आर्यनच्या प्रशिक्षणासाठी पाचारण केलं असल्याचं म्हंटलं जात आहे. नेटफ्लिक्सच्या लोकप्रिय ‘फौदा’ या वेबसीरिजचं दिग्दर्शन आणि लेखक लिओर यांनी केलं आहे. त्यामुळे अशा दिग्गज माणसाच्या तालमीत आपल्या मुलाला तयार व्हावं यासाठी शाहरुख जीवापाड प्रयत्न करतोय.
आर्यनच्या बरोबरीनेच सुहानाही झोया अख्तरच्या वेबसीरिजमधुन मनोरंजनविश्वात पदार्पण करणार आहे. या सीरिजची झलक लोकांना पाहायला मिळाली असून ती नेटफ्लिक्सवरच प्रदर्शित होणार आहे. सुहाना बरोबरच या सीरिजमधून अमिताभ बच्चन यांचा नातूही या क्षेत्रात पदार्पण करणार आहे.
